Երկուշաբթի նախագահ Դոնալդ Թրամփը հրապարակել է ԱՄՆ ազգային անվտանգության ռազմավարությունը, որի հիմնական թեմաներն են Ռուսաստանը, Չինաստանը, Իրանը, Հյուսիսային Կորեան, Մերձավոր Արևելքը: Ռուսաստանն ու Չինաստանը հռչակվում են «ռևիզիոնիստական գերտերություններ» և գլխավոր մրցակիցներ, իսկ Իրանն ու ԿԺԴՀ-ն՝ «իզգոյ-պետություններ»:
Թրամփն իր ելույթում նշել է, որ Մոսկվան ու Պեկինը մարտահրավեր են նետում ամերիկյան արժեքներին, ազդեցությանը, հարստությանը: Ազգային անվտանգության ռազմավարությունն իր մեջ ներառում է չորս ազգային առաջնահերթություն՝ ամերիկացիների պաշտպանություն ու բարեկեցության ավելացում, խաղաղության պաշտպանություն՝ ուժի միջոցով, և ամերիկյան գլոբալ ազդեցության մեծացում:
Նախագահ Թրամփի հրապարակած փաստաթղթում նշված է, որ ԱՄՆ-ը բախվում է երեք հիմնական մարտահրավերների՝ Չինաստանի և Ռուսաստանի ռևիզիոնիստական ձգտումներին, Իրանի և Հյուսիսային Կորեայի իզգոյ-պետություններին և, իհարկե, գլոբալ ահաբեկչությանը:
Ուշագրավ է Վաշինգտոնի այն դիտարկումը, որ Ռուսաստանն ու Չինաստանը մեծացնում են իրենց ռազմական պոտենցիալը՝ նոր աշխարհակարգ կառուցելու նպատակով: Ազգային անվտանգության ռազմավարության տեսանկյունից Ռուսաստանի միջուկային սպառազինությունը համարվում է ամենագործուն սպառնալիքն ԱՄՆ-ի համար: Փաստաթղթում նշվում է, որ Ռուսաստանը շարունակում է մեծացնել իր ռազմական պոտենցիալը՝ սպառնալիքի հիմնական աղբյուր մնալով իր հարևանների համար: Վաշինգտոնում նշում են, որ Ռուսաստանը հավատարիմ է մնում Սառը պատերազմի տրամաբանությանը և ագրեսիվ ինֆորմացիոն քաղաքականության միջոցով փորձում է խարխլել արևմտյան դեմոկրատիայի հիմքերը: ԱՄՆ ազգային անվտանգության նոր դոկտրինում հատուկ ընդգծված է Մոսկվայի ապակայունացնող դերը եվրասիական տարածաշրջանում՝ նոր ռիսկերի առաջացման վտանգով:
Փաստաթղթում նշվում է, որ Ռուսաստանն ու Չինաստանը վարում են անարդար տնտեսական քաղաքականություն՝ ԱՄՆ-ին համապատասխանաբար եվրասիական տարածքից, Կենտրոնական Ասիայից ու խաղաղօվկիանոսյան տարածաշրջանից դուրս մղելու համար: Վաշինգտոնում հաստատակամ են Մոսկվայի ու Պեկինի այդ քաղաքականությանը հակադրվելու հարցում: ԱՄՆ-ը մտադիր է ուժեղացել ՆԱՏՕ-ի «արևելյան ճակատի» պաշտպանությունը, այլ խոսքով՝ իր ռազմական ներկայությունը Ռուսաստանի սահմանների մոտ:
Ուշագրավ է, որ մեր հարևան Իրանը ԱՄՆ ազգային անվտանգության դոկտրինում հիշատակվում է բացառապես Հյուսիսային Կորեայի հետ նույն համատեքստում և համարվում է միջազգային ահաբեկչության հիմնական հովանավորը: Վաշինգտոնը մտադիր է Թեհրանին ու Փխենյանին զսպել հակահրթիռային պաշտպանության բազմաշերտ համակարգի զարգացման շնորհիվ:
«Խաղաղություն՝ ուժի միջոցով» սկզբունքը, որն ընկած է ԱՄՆ ազգային անվտանգության նոր ռազմավարության հիմքում, ԱՄՆ հեղինակավոր նախագահ Ռոնալդ Ռեյգանի քաղաքականությունը վերակենդանացնելու փորձ է, ինչն առաջիկայում ենթադրում է դիմակայության մեծացում ԱՄՆ-ի և Ռուսաստանի միջև նաև մեր տարածաշրջանում ու եվրասիական տարածքում:
