Վրաստանի վարչապետ Բիձինա Իվանիշվիլին խախտել է ընտրական օրենսդրությունը՝ ԶԼՄ-ներին ասելով այն թեկնածուի անունը, որի օգտին քվեարկել է: Այս մասին հայտնում է Վրաստանի Հանրային հեռուստաալիքը:
Հեռուստաալիքը բերում է այս հարցի շուրջ ԿԸՀ-ի մեկնաբանությունը, որը հաստատել է ընտրական օրենսդրությամբ մինչև ընտրատեղամասերի փակվելն ուղիղ եթերում նման հայտարարությունների արգելքը, մասնավորապես՝ արգելվում է կոնկրետ թեկնածուի անուն տալ:
Սակայն դեպքին արձագանքելը ԿԸՀ-ի լիազորությունների շրջանակում չէ, ուստի այս հարցի վերաբերյալ, հավանաբար, համապատասխան հայտարարություն կանի Հաղորդակցությունների կարգավորման ազգային հանձնաժողովը՝ փոխանցում է Interfax-ը:
Հանրային հեռուստաալիքը նշում է, որ նման խախտումը նախատեսում է որոշակի պատիժ, մասնավորապես՝ տուգանք:
Ավելի վաղ Իվանիշվիլին հայտարարել է, որ քվեարկել է իշխող «Վրացական երազանք» կուսակցությունից Գեորգի Մարգվելաշվիլիի օգտին:
