Սեֆիլյանի և մյուսների գործով դատական նիստում հետազոտվում են քրեական գործում առկա փաստաթղթերը: Հրապարակվեց փաստաթուղթ, համաձայն որի՝ 2016 թվականի մարտի 5-ին ԱԱԾ-ն ներքին դիտման թույլտվություն է խնդրել Սմբատ Գ.-ի նկատմամբ:
Այս փաստաթղթի հրապարակումից հետո Ժիրայր Սեֆիլյանի շահերի պաշտպան Տիգրան Հայրապետյանը հայտարարեց, որ հանցագործության պրովոկացիա է կատարել ԱԱԾ-ն՝ հավանաբար իր գործակալը հանդիսացող Սմբատ Գ.-ին ներդրել է, ստեղծել է ենթադրյալ խումբ, վերջում այդ ամենը «կպցրել» Սեֆիլյանին: Մեղադրանքի հիմքում դրվել են Սմբատ Գ.-ի նկատմամբ ներքին դիտման և գաղտնալսման արդյունքները:
Տիգրան Հայրապետյանը հայտարարեց. «Կա հանցագործության հրահրում, հանցագործության պրովոկացիա, միջնորդում եմ, որ դատարանը պահանջի Սմբատ Գ.-ի մասին օպերատիվ տեղեկություններ՝ նա գործակալ է, թե ոչ, և ինչ դերակատարում ունի այս գործում»:
Դատարանը այս միջնորդությունը համարեց ոչ ժամանակին արված և թողեց առանց քննության:
Նշենք, որ Սմբատ Գ.-ին 2016 թվականի մայիսի 20-ից հետո առաջադրվել է նույն մեղադրանքը, ինչ այս խմբի մյուս անդամներին, սակայն նա չի կալանավորվել, գտնվում է ազատության մեջ, և նրա մասը այս գործից անջատված է, ընթանում է նախաքննություն: