Google կորպորացիայի զուտ շահույթն այս տարվա երրորդ եռամսյակում ավելացել է 36%-ով՝ հասնելով 2.97 միլիարդ դոլարի: Անցած տարվա նույն ժամանակհատվածում զուտ շահույթը կազմել էր 2.18 միլիարդ դոլար: Այս մասին ասվում է ընկերության հաղորդագրությունում՝ փոխացնում է RIA Novosti-ն:
Մեկ բաժնետոմսի հաշվարկով շահույթը կազմել է 8.75 դոլար՝ 2012-ի հուլիս-սեպտեմբեր ամիսների 6.53 դոլարի փոխարեն: Google-ի եռամսյակային եկամուտն աճել է 12 տոկոսով՝ հասնելով 14.89 միլիարդ դոլարի, որից 1.14 միլիարդը բաժին է ընկել Motorola Mobility-ին: Ընկերության ցուցանիշները մի փոքր գերազանցել են վերլուծաբանների կանխատեսումները, ովքեր 14.84 միլիարդի եկամուտ էին կանխատեսում: Եռամսյակում Motorola-ի օպերացիոն կարուստը գնահատվել է 248 միլիոն դոլար:
Այս տարվա երրորդ եռամսյակում Google-ի եկամուտը գովազդից կազմել է 12.54 միլիարդ դոլար: Գովազդային «քլիքի» միջին արժեքը նվազել է 8 տոկոսով՝ անցած տարվա նույն ժամանակահատվածի ցուցանիշի համեմատ: Ընկերությունում այդ ցուցանիշը նվազում է արդեն երկրորդ տարին:
Վերջերս 15 տարին բոլորած Google-ի մեկ բաժնետոմսը հինգշաբթի Nasdaq բորսայում արժեցել է 889.21 դոլար: Տարեսկզբից բաժնետոմսերի արժեքն աճել է ¼-ով: Ֆինանսական հաշվետվության հրապարակումից կարճ ժամանակ անց բաժնետոմսերի արժեքը բարձրացել է 6 տոկոսվ՝ հասնելով 945 դոլարի: