Կատալոնիան պետք է գործի իրավական դաշտի շրջանակներում, եթե ցանկանում է բանակցություններ։ Այդ մասին հայտարարել է Իսպանիայի փոխվարչապետ Սորայա Սանես դե Սանտամարիան։
«Դեմոկրատների միջև յուրաքանչյուր երկխոսություն պետք է իրականացվի օրենքի շրջանակներում», – ընդգծել է նա։ Հայտնում է Mignews-ը։
Իսպանիայի կառավարությունը նիստ է ծրագրել հոկտեմբերի 11-ին, որի ընթացքում կընդունվի այնպիսի որոշում, որը կդառնա անկախության հանրաքվեի արդյունքների ամփոփման մասին Կառլոս Պուչդեմոնի հայտարարության պատասխանը։
Ավելի վաղ Կատալոնիայի ղեկավարն ընդգծել էր, որ հանրաքվեի արդյունքները հանրապետության տեսքով Կատալոնիայի անկախության համար ժողովրդի տված մանդատն են։ Ավելի ուշ Պուչդեմոնն ու կատալոնամետ պատգամավորները ստորագրել են անկախության մասին հռչակագիրը։
Փաստաթղթում բոլոր պետություններին ու միջազգային կազմակերպություններին կոչ է արվել Կատալոնիայի հանրապետությունը ճանաչել որպես անկախ ու ինքնիշխան պետություն։ Հոկտեմբերի 1-ին Կատալոնիայում անցկացվել է անկախության մասին հանրաքվե։
Դրան մասնակցել է 2.26 միլիոն մարդ, իսկ քվեարկելու իրավունք ունեցողների թիվը կազմել է 5.31 միլիոն մարդ։ Քվեարկության մասնակիցների ավելի քան 90 տոկոսը կողմ է արտահայտվել անկախությանը։
