Ադրբեջանական Vesti.az կայքի փոխանցմամբ՝ էներգետիկ գծով եվրոկոմիսար Գյունտեր Օտինգերն ու էներգետիկ հարցերով ԱՄՆ պետքարտուղարի հատուկ ներկայացուցիչ Ռիչարդ Մորնիգսթարը ժամանել են Ադրբեջան։
Նրանք մասնակցելու են հունիսի 7-10-ը Բաքվում կայանալիք «Կասպյան նավթ և գազ-2011» խորագրով ցուցահանդես-կոնֆերանսին։ Օտինգերն Ադրբեջանի պաշտոնատար անձանց հետ երկկողմանի հանդիպումներում քննարկելու է էներգետիկ ոլորտում համագործակցության, ինչպես նաև Nabucco նախագծի հարցերը։
Օտինգերի ադրբեջանական այցն ավարտվում է հունիսի 8-ին։
Մորնինգսթարն իր հերթին Ադրբեջանի պաշտոնատար անձանց հետ բանակցությունների ժամանակ քննարկելու է «Հարավային միջանցք» նախագծի հարցը, կասպյան էներգետիկ ռեսուրսների շահագործման ու դրանց փոխադրման հեռանկարները։
Հիշեցնենք, որ հունիսի 8-ին Թուրքիայի Կայսերի քաղաքում տեղի է ունենալու Nabucco նախագծի համաձայնագրի կնքումը։ Այն պետք է տեղի ունենար հունիսի 6-ին, սակայն, ամենայն հավանականությամբ, երկու օրով դրա հետաձգումը պայմանավորված է վերոնշյալ այցերով, որոնք միտված են Nabucco-ին Ադրբեջանի միանալու վերջնական դիրքորոշման հստակեցմանը։
