Մոտ 380 մարդ է ձերբակալվել Մոսկվայի հարավում զանգվածային անկարգությունների ընթացքում: Կիրակի օրը մի քանի հարյուր հավաքվածներ բողոքի ակցիա են իրականացրել Բիրյուլևոյի շրջանում, որը բախման է վերածվել ոստիկանության հետ: Այս մասին հաղորդում է BBC-ն:
Նշվում է, որ 5 ոստիկան է տուժել: Բացի դրանից՝ ոստիկանությունը փակել է այդ շրջան տանող գլխավոր ճանապարհները:
Զանգվածային հուզումներ են տեղի ունեցել նաև Մոսկվայի հյուսիս-արևմուտքում, որտեղ 60 մարդ է ձերբակալվել:
Նշենք, որ կիրակի օրը ցերեկը Բիրյուլևոյում բողոքի ակցիայի ժամանակ մոտ 600 մարդ գրավել են «Բիրյուզա» առևտրի կենտրոնը, որտեղ, ակցիայի մասնակիցների կարծիքով, հավաքվում են միգրանտները` պահանջելով գտնել 25-ամյա Եգոր Շերբակովի մարդասպանին: