«Իրազեկ քաղաքացիների միավորում» ՀԿ-ն սեպտեմբերի 1-ին նամակ է ստացել Ռուսաստանի Դաշնության Կապի, տեղեկատվական տեխնոլոգիաների և զանգվածային կոմունիկացիաների վերահսկման դաշնային ծառայությունից (Роскомнадзор): Նամակով ՌԴ պետական մարմինը պահանջում է «Իրազեկ քաղաքացիների միավորման» ArmRus.info լրատվական կայքից հեռացնել Հայաստանի ներդրողների ակումբի անդամ Ռուբեն Թաթուլյանի (քրեական աշխարհում հայտնի «Ռոբսոն» մականվամբ)՝ Չեխիայում ձերբակալության մասին նյութը: Роскомнадзор-ը նամակում պահանջ-խնդրանքը հիմնավորում է Ռուսաստանի Դաշնության «Անձնական տվյալների մասին» օրենքի դրույթներով:
Այս կապակցությամբ «Առաջին լրատվական»-ը զրուցեց «Իրազեկ քաղաքացիների միավորում» ՀԿ ծրագրերի համակարգող Դանիել Իոաննիսյանի հետ։ Հարցին՝ արդյոք ռուսական պետական այս կառույցն ունի՞ որևէ իրավասություն միջամտելու հայաստանյան լրատվամիջոցի գործունեությանը, Դանիել Իոաննիսյանը պատասխանեց. «Роскомнадзор-ը ՌԴ-ում ունի այդպիսի իրավունք, բայց դա միայն Ռուսաստանում և Ռուսաստանի օրենսդրությամբ, որը, բարեբախտաբար, չի տարածվում ՀՀ-ի վրա։ «Իրազեկ քաղաքացիների միավորում»-ը և ArmRus.info կայքը, որը մեր ստորաբաժանումներից է, գործում են ՀՀ-ում, և մենք Հայաստանի ռեզիդենտ կազմակերպություն ենք և առաջնորդվում ենք միայն ՀՀ օրենսդրությամբ, իսկ ՀՀ օրենսդրությունը, այդ թվում նաև «Անձնական տվյալների պաշտպանության մասին» օրենքի 8-րդ հոդվածը, հստակ սահմանում են, թե ինչն է թույլատրելի, ինչը՝ ոչ, և մենք գործել ենք այս օրենքների շրջանակներում։ Այդ իսկ պատճառով մենք չենք հեռացնելու այդ նյութը, և Роскомнадзор-ը չի կարող մեր դեմ միջոցներ ձեռնարկել. առավելագույնը, ինչ նրանք կարող են անել, մեր կայքը Ռուսաստանում բլոկ անելն է, որպեսզի այնտեղ հասանելի չլինի այլևս, սակայն դժվար թե դիմեն այդ քայլին»։
Այս համատեքստում, սակայն, Դանիել Իոաննիսյանը առավել ուշագրավ մեկ այլ խնդիր մատնանշեց. «Տվյալ նյութի մեջ անձնական կյանքին վերաբերող որևէ տեղեկություն չի եղել, այլ նյութը բացառապես վերաբերել է Չեխիայում նրա ձերբակալությանը։ Ռուբեն Թաթուլյանը ՀՀ դիվանագիտական անձնագրի կրող է, ՀՀ քաղաքացի է, վարչապետ Կարեն Կարապետյանի ստեղծած ներդրողների ակումբի անդամ է և ըստ էության հանրային հայտնի անձնավորություն է, բայց նա դիմում է մեկ այլ երկրի պետական մարմնին՝ փորձելով ճնշում գործադրել հայաստանյան լրատվամիջոցի վրա. սա մտահոգիչ է։
Սա է, որ մեզ ստիպելու է առավել հետաքրքրությամբ զբաղվել այդ անձով, որը, փաստորեն, օտարերկրյա պետական մարմին է փորձում «մեզ վրա բերել»։ Առաջիկայում մենք կփորձենք պարզել, թե Ռուբեն Թաթուլյանը ինչ սկզբունքով է ընտրվել վարչապետի ներդրողների ակումբում, ինչով շարունակվեց Չեխիայում նրա ձերբակալության պատմությունը, ինչու է նա ստացել ՀՀ դիվանագիտական անձնագիր և այլն»։
Մանրամասները՝ տեսանյութում։
