Սեպտեմբերի 1-ին ընդառաջ, հաշվի առնելով երեխաների և դեռահասների համար նախատեսված որոշակի ապրանքների նկատմամբ պահանջարկի կտրուկ մեծացումը, ինչպես նաև ՀԿ-ների կողմից բարձրացված խնդիրը, որ շուկայում առկա են բազմաթիվ դեպքեր, երբ վաճառվում է առանց որակի հավաստման և մակնշման ապրանք, Տնտեսական զարգացման և ներդրումներ նախարարության Շուկայի վերահսկողության տեսչական մարմինը (ՇՎՏՄ) հայտնում է՝ խնդիրը գտնվում է տեսչական մարմնի ուշադրության կենտրոնում, և այն հաշվի է առնվելու ստուգումների հաջորդ տարվա ծրագրի կազմման ժամանակ։ Այս մասին տեղեկացրին ՇՎՏՄ իրազեկման, խորհրդատվության և հանրության հետ տարվող աշխատանքների բաժնից՝ հավելելով. « ՇՎՏՄ-ն տնտեսվարողներին հորդորում է` հետևել ոլորտը կարգավորող տեխնիկական կանոնակարգերին և վերացնել բացթողումները։
Կոչով նաև դիմում ենք սպառողներին՝ Ձեր և Ձեր երեխաների անվտանգությունը կարևորելով, վաճառողից պահանջեք որակի հավաստման փաստաթուղթ՝ պետական գրանցում, սերտիֆիկատ, հայտարարագիր։ Ուշադրություն դարձրե’ք հայերեն մակնշման առկայությանը, որը պետք է պարունակի հետևյալ տեղեկությունները՝
- արտադրանքը պատրաստող երկրի անվանումը,
- պատրաստողի (պատրաստողի կողմից լիազորված անձի), ներմուծողի, դիստրիբյուտորի անվանումը և գտնվելու վայրը,
- արտադրատեսակի անվանումը և տեսակը (նշանակությունը),
- պատրաստման ամսաթիվը,
- արտադրանքի գործածության ժամկետն (անհրաժեշտության դեպքում),
- գործածության երաշխիքային ժամկետն (անհրաժեշտության դեպքում),
- շուկայում շրջանառության միասնական նշանը` ,
- ապրանքային նշանը (առկայության դեպքում)։
Արտադրանքի մակնշումը զետեղվում է արտադրանքի, արտադրատեսակին ամրացվող պիտակի կամ ապրանքանիշի, արտադրատեսակի փաթեթվածքի, արտադրատեսակների խմբի փաթեթվածքի կամ արտադրանքի թերթ–ներդրակի վրա:
Հատկապես կարևոր է ուշադիր լինել մակնշման հետևյալ տեղեկություններին՝ տարիքային որ խմբի համար է նախատեսված տվյալ արտադրանքը, ինչ նյութից է պատրաստված, օգտագործման եղանակը։
Ներկայացնում ենք նաև ոլորտը կարգավորող տեխնիկական կանոնակարգի որոշ պահանջներ, որոնք կօգնեն ճիշտ կողմնորոշվել շուկայում։
Հիշե’ք, մինչև 3 տարեկան երեխաների կոշկեղենի պարագայում չի թույլատրվում՝ բաց կրնկային մաս, 3– 7 տարեկան երեխաների համար չֆիքսված կրնկային մաս՝ բացառությամբ կարճաժամկետ կրելու համար նախատեսված կոշիկների։
Աշակերտական պորտֆելները և ուսապայուսակները պետք է ունենան դիմային և կողային մակերևույթների վրա լուսարձակող տարրերով դետալներ ու ֆուրնիտուրա և պատրաստված լինեն հակադիր գույներով նյութերից։ Ցածր դպրոցական տարիքի երեխաների համար աշակերտական ուսապայուսակները պետք է համալրված լինեն ձևակայուն մեջքով։ Ուշադրություն դարձրեք նաև ներկվածքի կայունությանը։
Հրատարակչական արտադրանքի կենսաբանական անվտանգությունը սահմանվում է տառատեսակային ձևավորման պարամետրերով և տեքստերի ձևավորման եղանակներով՝ կախված հրատարակության տեսակից, միաժամանակ կարդալու տեքստի ծավալից, օգտագործողի տարիքից և երեխաների ու դեռահասների տեսողական օրգանների ֆիզիոլոգիական առանձնահատկություններին համապատասխան»:
