Գյուղացիական կոոպերացիաները չպետք է շփոթել կոլտնտեսությունների հետ, ինչը հաճախ արվում է։ Այս մասին այսօր հայտարարեց գյուղատնտեսության նախարար Սերգո Կարապետյանը «Համայնքների գյուղատնտեսական ռեսուրսների կառավարման և մրցունակության» ծրագրի քննարկման ժամանակ։ «Կոոպերացիան մարդկանց միավորումն է գաղափարների շուրջ, եթե միավորվում են, որոշ աշխատանքներ միասին են կազմակերպում, շահում են բոլորը»,- ասաց նախարարը։
Նրա խոսքով, կոոպերատիվների դեպքում յուրաքանչյուրը պահպանում է իր սեփականությունը, կարող է իր ցանկությամբ ցանկացած պահի մտնել կամ դուրս գալ կոոպերատիվից, յուրաքանչյուրի եկամուտներն ու շահույթները առանձին են՝ չի ձևավորվում միասնական շահույթ, որը բաժանելու կարիք լինի։ Պարզապես որոշ աշխատանքներ գյուղացիական տնտեսությունները միասին են կատարում, ինչը մեծացնում է առանձին գյուղացիական տնտեսությունների եկամուտները։
«21.3 մլն դոլար արժողությամբ այս ծրագիրը ենթադրում է, որ պետությունը կատարում է որոշ աշխատանքներ, բայց որոշ աշխատանքներում էլ պետք է համայնքները և կոոպերատիվները մասնակցություն ունենան։ Ենթակառուցվածների կազմակերպման, արոտավայրերի ջրարբիացման, ճանապարհների կառուցման հարցերում համայնքները ունենում են մասնակցություն կատարված աշխատանքներին՝ 5%-ի չափով։ Իսկ չմշակվող վարելահողերի համար սերմերի և գյուղատնտեսական տեխնիկայի ձեռքբերման համար կոոպերացիաները պետք է մասնակցեն 50%-ի չափով»,- ասաց նախարարը։