Գեղարվեստական գրականություն կարդալը զարգացնում է մտավոր գործընթացները՝ պարզել են ամերիկացի գիտնականները, որոնց հետազոտությունը հրապարակվել է գիտական Science ամսագրում:
Հոգեբանության պրոֆեսոր Էմանուելե Կաստանոն և նրա ասպիրանտ Դևիդ Քորներ Քիդը՝ նյույորքյան Սոցիալական հետազոտությունների դպրոցից, ցույց են տվել, թե ինչպես է վիպագրությունը բարելավում մի շարք մտավոր ունակություններ, զարգացնում մտածողության գործընթացը, որոնք կարևոր են մարդկանց միջև սոցիալական փոխհարաբերությունների համար:
Նրանք 5 առանձին փորձեր են անցկացրել 86 կամավորների հետ, որոնց առաջարկել են կարդալ գրական-գեղարվեստական, ոչ գեղարվեստական և հանրաճանաչ գրականություն: Մարդիկ, ովքեր ընթերցել են գեղարվեստական գրականությունից հատված, անհամեմատ լավ են կարողացել հաղթահարել իրենց առաջադրված «հոգեբանական թեստերը»: Այլ կերպ ասած՝ նրանք սոցիալապես ավելի ընդունակ են, ավելի «մարդկային», քան նրանք, ովքեր կարդացել են պարզապես տեղեկատվություն՝ անգամ շատ լավ շարադրված: