Քանդակագործ Վիգեն Ավետիսը, անդրադառնալով երեկ ԱԺ-ում գլխավոր դատախազի քվեարկությանը, նշեց, որ զարմացած չէ կատարվածով, քանի որ 5000 դրամով ժողովուրդը վաճառել է իր ազատությունը, անկախությունը, ընդդիմանալու իրավունքը, այսինքն՝ հայ ժողովուրդն այսօր ընտրության և ընդդիմանալու որևէ լծակ չունի, չկա հանրության կամարտահայտման որևէ կառույց, այդ պատճառով կամայական որոշումներ են ընդունվում: Նրա դիտարկմամբ՝ սա ցույց տվեց, որ յուրաքանչյուր որոշում կամայականորեն վավերացվում է ԱԺ-ում, այսինքն՝ ԱԺ-ն դարձել է այն կառույցը, որ իրավունք ունի կամայականություններ և հատուկ դավադրություններ հրահրել, և չկան ուժեր, ովքեր կբարձրաձայնեն խնդիրը:
«Զարմանում եմ, որ լրատվամիջոցները զարմանում են, երբ ասում ենք՝ ընդդիմություն գոյություն չունի, իսկ ընդդիմություն գոյություն չունի շատ երկար ժամանակ, և սա ուղղակի դրա մի փոքր ցուցադրությունն էր»,- ասաց Վիգեն Ավետիսը:
Նա համաձայն չէ այն պնդման հետ, թե երկրում ոչ ընդդիմություն կա, ոչ իշխանություն: Ըստ նրա՝ երկրում կա իշխանություն, բայց չկա ընդդիմություն, այն իշխանության հետ սերտաճած է, և ընդդիմությունն ինքն էլ չունի որևէ պատճառ ընդդիմանալու:
Ըստ նրա՝ նախկին ձևական ընդդիմադիր լինելու մասը այլևս չի պահպանվում:
Ըստ Վիգեն Ավետիսի՝ ժողովուրդը օր առաջ պետք է պահանջի ԱԺ-ի լուծարումը և նոր ԱԺ ընտրություններ: Սակայն այս դեպքում էլ քանդակագործը հույս չունի, թե արդար ընտրություններ կանցկացվեն, քանի որ Փակ շուկայի համար պայքարը ցույց տվեց, որ մեր ժողովրդին կաշառում են, անօրինականության դեմ քաղաքացիների հանում: Իրավիճակը, ըստ նրա, իրոք շատ մտահոգիչ է և օրհասական:
Անդրադառնալով ընդդիմադիրների կեցվածքին՝ նա նշեց, որ պետք է մինչև վերջ սկզբունքային լինել, պարզ է, որ գրեթե անհնար է իշխանության օրինագիծը ոչնչացնել, բայց սկզբունք ունենալը պարտադիր է:
Հիշեցնենք, որ երեկ ԱԺ-ում 103 կողմ և 3 դեմ ձայնով Գևորգ Կոստանյանն ընտրվեց գլխավոր դատախազ, սակայն մինչև հիմա պարզ չէ, թե ովքեր էին երեք դեմ քվեարկածներից երկուսը:
Լուսանկարը՝ PanARMENIAN Photo-ի
