Վրաստանում ձերբակալել են YouTube-ում տարածած տեսանյութի կասկածյալին, որում սպառնալիքներ են հնչում Աֆղանստանում գտնվող վրացական կոնտինգենտի և Միխեիլ Սաակաշվիլիի հասցեին: Սպառնում էին նաև ջիհադը տեղափոխել Վրաստան: Ինչպես հաղորդում է gazeta.ru-ն, այս մասին Facebook սոցիալական կայքի էջում հաղորդել է ՆԳՆ-ի հասարակության հետ կապերի բաժնի ղեկավար Նինո Գիորգոբիանին:
Հաղորդագրության համաձայն՝ պարզվել է այն անձի ինքնությունը, ով կատարել է այդ հանցագործությունը, և դատարանը նախնական կալանքի է ենթարկել նրան:
«Այդ գործը վաղուց է հետաքննվել, չնայած տեղեկատվությունն այդ մասին չի հրապարակվել՝ ելնելով հետաքննության շահերից: Գործի մանրամասների մասին կհաղորդեմ հինգշաբթի՝ մամլո ասուլիսին»,- գրել է նա:
Ձերբակալվածի անունը չի հաղորդվում: «Աֆղանստանում վրացական զորքերի դեմ ջիհադ» անվանումով տեսանյութը համացանցում հայտնվել է աֆղանական Հիլմենդ մարզում վրացական բազայի դեմ իրագործված ահաբեկչությունից առաջ, որի հետևանքով զոհվեցին վրացի յոթ զինծառայող:
