Իսպանական Marca պարբերականի լրագրող Ռոբերտո Պալոմարը գնահատել է Մադրիդի «Ռեալ»-ի նախագահ Ֆլորենտինո Պերեսի գործողությունները:
«Պերեսը միշտ պայքարում է, որ շեյխերը չկարողանան ղեկավար պաշտոններ զբաղեցնել ակումբում: Նա հայտարարում է, որ դա օգնում է ազատվել օտարերկրյա ներդրողներից և պահպանել ակումբը «բարի» ձեռքերում: Սակայն ժամանակն է հարց ուղղել`արդյո՞ք ինքը` «Ռեալ»-ի նախագահը շեյխ չէ: Ի վերջո, եթե Պերեսը գործում է շեյխի նման, խոսում է շեյխի նման, հավանաբար, ինքն էլ հենց շեյխ է:
Եթե ավելի ուշադիր ուսումնասիրենք «Ռեալ»-ը, ապա կարող ենք տեսնել, որ «արքայական ակումբ»-ը մի թիմ է, որը կառուցված է անձնական, այլ ոչ թե ակումբային շահերի համապատասխան:
«Ռեալ»-ը կշարունակի հաղթել, քանի որ հաղթանակներն անհրաժեշտ են ակումբի հեղինակության համար և քանի որ թիմում հանդես են գալիս բազմաթիվ աստղեր: Սակայն այն ավելի շատ է նմանվում շեյխի սեփականության, իսկ Պերեսն էլ հենց այդ շեյխն է: Ուրեմն` Պերեսը շեյխ է, իսկ «Ռեալ»-ը նրա ստեղծագործությունն է »,- գրել է Պալոմարը:
Հիշեցնենք` «Ռեալ»-ը հրաժարվել է ակումբի լեգենդ Ռաուլի ծառայություններից` 2010 թվականի ամռանը վաճառելով նրա տրանսֆերը «Շալկե»-ին, իսկ լեգենդար դարպասապահ Իկեր Կասիլյասը ստիպված է նստել պահեստայինների նստարանին, քանի որ թիմը ձեռք է բերել Դիեգո Լոպեսի իրավունքները:
