Այսօր «Հրապարակ» օրաթերթը գրել էր, որ «Արմենիա» հեռուստաընկերության հաղորդավար Ավետ Բարսեղյանին հեռուստաընկերության տնօրինությունն ազատել է աշխատանքից: Պատճառը հաղորդման ընթացքում հյուրի՝ դերասան Հովհաննես Ազոյանի («Հովոյի») քաղբանտարկյալների, այդ թվում՝ Նիկոլ Փաշինյանի ազատ արձակման մասին զրույցն է եղել, եթերում համաներումն էլ դրական քայլ է համարվել, ինչը հարուցել է տնօրինության զայրույթը:
Ավետ Բարսեղյանը, սակայն մեզ հետ զրույցում նշեց, որ շարունակում է աշխատել «Արմենիա» հեռուստաընկերությունում, պարզապես ամսվա վերջ է եղել, և պայմանավորված նոր նախագծերի քաղաքականությամբ՝ «Բարի լույս» ծրագիրն այլևս ինքը չի վարելու. «Ոչ մի խրտնոց, սահմռկեցուցիչ բան չի եղել, պարզապես «Արմենիա» հեռուստաընկերության կողմից ծրագրային փոփոխություններ են տեղի ունեցել, «Արմենիա» հեռուստաընկերությունն ինձ տեսնում է ուրիշ նախագծերի մեջ»,- ասել է Ավետ Բարսեղյանը՝ ավելացնելով, որ հասկանում է՝ ինչից է այդպիսի կարծիք ձևավորվել, քանի որ այդ հաղորդումից հետո ինքը հաջորդ օրը եթերում չի եղել. «Գուցե դա է այդ ռեզոնանս առաջացրել: Ասեմ ավելին՝ Արմենիա հեռուստաընկերությունը ինչ-որ նախագծերում հենց ինձ է տեսնում»,- նշել է Ավետ Բարսեղյանը:
