The Times լոնդոնյան թերթի թիմը հաղթել է հաքաթոնի ընտրական փուլում, որը Google-ի աջակցությամբ սեպտեմբերի 26-27-ին անցկացվել է բրիտանական The Guardian պարբերականում ԶԼՄ-ների գլխավոր խմբագիրների և ղեկավարների ասոցիացիայի Global Editors Network-ի կողմից:
Հաքաթոնը միջոցառում է, որի ընթացքում տարբեր ոլորտի մասնագետները համախմբված կերպով աշխատում են ինչ-որ խնդրի լուծման ուղղությամբ: Երկու օր շարունակ մի քանի ԶԼՄ-ների ներկայացուցիչներ աշխատել են խմբագրական նոր մոտեցումների և մեդիածառայությունների մշակման վրա: Յուրաքանչյուր ԶԼՄ-ի թիմ բաղկացած է եղել երեք մարդուց՝ խմբագրից կամ լրագրողից, ծրագրավորողից և դիզայներից:
Լոնդոնյան հաքաթոնում միմյանց հետ մրցել են Haymarket Business Group-ի, Times, BBC, Daily Post, Guardian և Metro թերթերի թիմերը: Նրանք ստեղծել են թվային կոնտենտ և առցանց հրապարակումները մեկնաբանելու նոր կոնցեպտ, որը պետք է փոխարինի էլեկտրոնային ԶԼՄ-ներում գրառման մեկնաբանությունների տեղակայման ձևաչափին:
Հաղթողներն առաջարկել են «Times ջերմաչափ» նախագիծը, որը ստեղծվել է մեկնաբանությունների ֆիլտրացման համար՝ ընթերցողների տրամադրության սկզբունքով և հաշվի առնելով այն, թե նրանք ինչ են իրականում մտածում ընթերցված նյութի մասին: Ըստ նախագծի՝ «ջերմաչափը», որի «ցուցիչը» գտնվում է հրապարակված գրառման տակ, լուծում է խնդիրը, որի հետ մշտապես բախվում է թերթը. ընթերցողներից զգալի ժամանակ է պահանջվում գրառման տակ գտնվող մեկնաբանություններն ընթերցելու համար: