Թուրքական Zaman թերթի փոխանցմամբ՝ երեկ Անթալիայում հավաքվել են սիրիացի ընդդիմադիրները՝ քննարկելու իրենց երկրում տիրող իրավիճակը։ «Սիրիայում փոփոխությունների օգտին» խորագրով կոնֆերանսը տևելու է 3 օր։
Նշվում է, որ Անթալիայում հավաքվել են ընդդիմադիր կազմակերպությունների, այդ թվում՝ «Մուսուլման եղբայրներ» իսլամական շարժման բազմաթիվ ներկայացուցիչներ։
Սիրիացի ընդդիմադիրները հանդես են գալիս նախագահ Բաշար Ալ-Ասադի հրաժարականի օգտին և անբավարար են համարում նրա հայտարարած համաներումը։
Կոնֆերանսում «Մուսուլման եղբայրներ»-ի պատվիրակության ղեկավար Մելհեմ ալ-Դուրուբին և մյուս մասնակիցները հայտարարել են, որ երկիրը կարիք ունի ռեժիմի փոփոխման և ոչ թե համաներման, ինչի համար էլ Ասադը պետք է հեռանա և կանգնի դատարանի առջև։ Դա լինելու է իրենց պայքարի առաջին փուլը։
Բացի այդ, սիրիացի ընդդիմադիրները համաձայնության են հանգել հետագա երեք կետերի շուրջ. երկրի ներսում ուժի ու բռնության կիրառման վերացում, օտար միջամտության դեմ պայքար, քաղաքացիական (ժողովրդավարական) Սիրիայի ստեղծում։
Նույն ժամանակ միջերկրածովյան Անթաքյայում էլ հավաքվել են Ասադի կողմնակիցները և իրենց դժգոհությունը հայտնել Անթալիայում սիրիացի ընդդիմադիրների հավաքվելու կապակցությամբ։
Հիշեցնենք, որ ապրիլի վերջին էլ սիրիացի ընդդիմադիրները հավաքվել էին Ստամբուլում։ Փորձագետների կարծիքով, սիրիացի ընդդիմադիրների թուրքական այս հավաքները Թուրքիայի վարչապետ Էրդողանի կողմից Ասադին ուղղված ազդանշաններ են։
Մայիսի 25-ին թուրքական Milliyet թերթը, վկայակոչելով Իսրայելի կառավարությանը մոտ կանգնած DEBKA հետախուզական կայքը, նշել էր, թե Սիրիայի նախագահ Բաշար Ասադն արագորեն կորցնում է Թուրքիայի վարչապետ Էրդողանի և մուսուլմանական աշխարհի աջակցությունը.
«DEBKA-ի տվյալներով՝ Էրդողանը կառավարության ներկայացուցիչների հետ դռնփակ հանդիպման ժամանակ նույնիսկ հրահանգել է կարճ ժամանակահատվածում խզել Դամասկոսի հետ հարաբերությունները: Դա հիմնականում պայմանավորված է քրդական գործոնով»:
Իսկ մայիսի 31-ին բրիտանական The Independent պարբերականը գրեց, որ Սիրիայում քաղաքացիական պատերազմ սկսվելու դեպքում գաղթականների մեծ ներհոսքը կանխելու համար թուրքական բանակը պատրաստ է ներխուժել Սիրիա և ստեղծել անվտանգության գոտի։
