Կառավարությունից պատասխանել են ԱԺ ՀՀԿ-ական նախկին պատգամավոր գործարար Աշոտ Աղաբաբյանի նամակներին, որոնք վերաբերում էին «Հրազդան» մարդադաշտի հետագա ճակատագրին: Մասնավորապես, երբ վերջերս ԱԺ-ն ընդունում էր պետգույքի մասնավորեցման 2017-2020 թթ. ծրագրի նախագիծը, մասնավորեցվող ընկերությունների ցանկում ընդգրկված էր նաև «Հրազդան» մարզադաշտը»: Աղաբաբյանը նամակով դիմել էր կառավարությանը՝ պահանջելով մասնավորեցման ցուցակից հանել «Հրազդան» մարզադաշտը: Աղաբաբյանը դեմ է մասնավորեցմանը, քանի որ այն համարվում է «Հրազդան» կենտրոնական մարզադաշտի անբաժանելի մասը, որը 2 տարով վարձակալված է կենտրոնական մարզադաշտի կողմից: Աղաբաբյանի խոսքով՝ կառույցը սնանկացման եզրին է և չի կարող մասնավորեցվել: Աղաբաբյանը նշել էր, որ եթե կառավարությունը չընդառաջի և ընկերությունը չհանի մասնավերցվողների ցանկից, ապա հուսով է, որ գոնե սեփականաշնորհման ժամանակ նորմալ գին կառաջարկվի, և ինքը կկարողանա ձեռք բերել այն: «Եթե չընդառաջի կառավարությունը, ոչինչ էլ չեմ անի, ինչ կարող եմ անել… Քանի որ սպորտային նշանակության շինություն է, հուսով եմ՝ մասնավորեցման բարձր գին չեն գնահատի, և մենք կհաշվարկենք մեր միջոցները ու հնարավոր է՝ սեփականաշնորհենք: Իսկ ներկայումս սահմանված գինը խելքին մոտ չէ»,- մեզ հետ զրույցում ասել էր նա:
Աշոտ Աղաբաբյանը այսօր «Առաջին լրատվական»-ի հետ զրույցում ասաց, որ կառավարություն մի քանի առաջարկությամբ նամակներ էին ուղարկել, որոնց բոլորին էլ պատասխան տրվել է: «Մենք մի քանի հարցով էինք դիմել կառավարությանը: Օրինակ՝ այնտեղ արևային ապակիներով էներգա ստանալու մասով դրական պատասխան են տվել: Խնդրանքներից մեկն այն էր, որ հարկերից ազատեին մեզ, բայց այդ մասով մերժել են: Դրական արձագանք չի եղել նաև սեփականաշնորհվող ընկերությունների ցանկից ստադիոնը հանելու վերաբերյալ մեր դիմումին»,- ասաց Աղաբաբյանը:
Նրա խոսքով, սակայն, հիմա մարզադաշտը վարձակալված է իրենց կողմից, և մինչև վարձակալության ժամկետը չլրանա, գույքը չի կարող վաճառքի հանվել: «Մենք 25 տարով արենդայով վերցրել ենք ստադիոնը: Մինչև մեր արենդայի ժամկետը չվերջանա, այսինքն՝ մինչև 2031 թիվը, այն չեն կարող վաճառել: Դրա համար էլ հետաձգվել են նաև գնի հետ կապված հարցերը»,-ասաց Աղաբաբյանը:
Թե ինչ է լինելու 2031 թվականից հետո, հնարավո՞ր է՝ հենց իրենք գնեն մարզադաշտը: Ի պատասխան հարցադրման՝ Աղաբաբյանն ասաց, որ դեռ հարց է: «Հնարավոր է գնենք, բայց դեռ հարց է՝ կարողանալո՞ւ ենք պահել ստադիոնը, թե՞ ոչ: Հիմա այն սնանկացած վիճակում է: Պարտքատերերը պարտքերն են ուզում: Փորձում ենք առողջացման ծրագիր ներկայացնել: Ուղղակի բանկը չի համաձայնում ֆինանսավորում տրամադրել: Հիմա մտածում ենք՝ ինչպես վերանայել ծրագիրը, որ կարողանանք բանկի հետ լեզու գտնել և ոտքի հանել ստադիոնը:
Աշոտ Աղաբաբյանը մեզ հետ զրույցում անդրադառնալով քաղաքական հարցերին՝ ասաց, որ բացարձակապես չի հետևում ԱԺ աշխատանքներին, չի կարոտում այդ աշխատանքը: «Ո՛չ հետևում եմ, ոչ էլ բացարձակ կարոտում եմ ԱԺ-ն: Ես վերցրել եմ մի ուրիշ կուրս՝ աշխատատեղեր ստեղծել, զորացրված տղաների համար աշխատատեղեր ապահովել»,-ասաց նախկին պատգամավորը:
