«Սասնա ծռերի»՝ և՛18-ի, և՛ 14-ի, և Ժիրայր Սէֆիլյանի ու ընկերների գործով աննախադեպ ու փակուղակին իրավիճակ է ստեղծվում: Դատավորը դատաքննություն սկսելու համար կամ պետք է նիստերն անցկացնի առանց ամբաստանյալների, կամ նիստերն, ըստ էության, չեն կայանա, քանի որ պաշտպաններն առանց իրենց պաշտպանյալների նիստերին չեն մասնակցի: «Իսկապես աննախադեպ իրավիճակ է: Դատարաններն այս գործերով առանց ամբաստանյալների, առանց նրանց պաշտպանների նիստեր են անցկացնում: Քրեադատավարական օրենսգրքի իմաստով հայաստանյան դատարաններն իսկապես աննախադեպ իրավիճակ են ստեղծել: Դատավորը հայտարարում է, որ նախապատրաստական փուլում փաստաբանների ներկայությունը պարտադիր չէ, այլևս ասելիք չի մնում: Դատավորի հայտարարությունը քրեադատավարական օրենսգրքի հետ ոչ մի առնչություն չունի: Եվ դժվարանում եմ ասել, թե դատավորն ինչով է առաջնորդվում»,- «Առաջին լրատվական»-ի հետ զրույցում ասաց «Սասնա ծռերի» գործով ներգրավված Արայիկ Պապիկյանը, որը այսօր չէր մասնակցել նիստին և լքել էր նիտերի դահլիճը:
Պապիկյանի խոսքերով՝ ստեղծված փակուղային իրավիճակից ամենաօպտիմալ լուծումն այն է, որ դատավարությունը բերվի օրինական դաշտ և փորձ չարվի մարդկանց լռեցնել և խախտել նրանց դատավարական օրինական իրավունքները: Ինչպես նաև հնարավորություն տալ, որ դատավարության բոլոր մասնակիցներն ունենան հավասար իրավունքներ դատական նիստերի վերաբերյալ իրենց դիրքորոշումը հայտնելու վերաբերյալ: «Քանի դեռ դատարանը չի կատարել այս ամենը և դրան հակառակ՝ հետապնդում է մարդկանց լռեցնելու նպատակ, դատավարություններն այդպես էլ կմնան փակուղային իրավիճակում»,-ասաց Պապիկյանը:
Փաստաբանի խոսքերով՝ իրավիճակը միտումնավոր է ստեղծվել, վաղօրոք մշակված պլանի համաձայն է ամեն ինչ ընթանում: «Սա պատահականություն չէ: Կա հստակ մշակված սցենար և պլան, որի ամբողջ իմաստն այն է, որ դատարանում թույլ չտան գործով ներգրավված ամբաստանյալներին արտահայտվել դատարանի դահլիճում: Եվ քանի որ խնդիրն այդ հարթության մեջ է դրված, մյուս կողմից կա հակազդեցություն, մնացել է մի միջոց՝ անցնել պատժիչ գործողությունների: Հակառակ դեպքում ենթադրել, որ սա պատահականություն է, ապա չի լինի: Պատահականորեն այսպես չի լինում»,- նկատեց Պապիկյանը՝ ավելացնելով, որ իր ասածի ամենավառ ապացույցն այն է, որ այս գործով առ այսօր որեւէ փաստաբան նախազգուշացում չի ստացել, այլ ստացել է միանգամից խիստ սանկցիա: «Սա ոչ պատահականություն է, ոչ էլ պահի ազդեցության տակ կայացված որոշում: Սա սցենարի մի մասն է»,- ասաց փաստաբանը՝ հավելելով, որ հաջորդ նիստին էլ անպայման ներկայանալու է, բայց այսօրվա սցենարի կրկնությունը չի բացառվում:
Ինչ վերաբերում է փաստաբանների նկատմամբ համատարած կիրառվող սանկցիաներին ու դրանց վերաբերյալ Փաստաբանների պալատի լոյալ դիրքորոշմանը, ապա Պապիկյանի խոսքերով՝ Պալատի խորհուրդը պարտավոր է ուսումնասիրել այդ գրությունները, տեսնել կարգապահական վարույթի համար հիմք կա, թե ոչ: Սակայն փաստաբանի խոսքերով՝ Պալատը պարտավոր էր այս գործընթացի հենց առաջին փուլում առարկայական դիրքորոշում հայտնել խնդրի վերաբերյալ: «Դրանից հետո խնդիրն այդքան չէր խորանա և այս պատկերը չէր ունենա: Բայց ամեն դեպքում ունենք այն, ինչ ունենք և Պալատը յուրաքանչյուր կոնկրետ դեպքի վերաբերյալ պետք է կայացնի համապատասխան որոշում»,- ասաց Պապիկյանը:
Լուսանկարը՝ Photolure-ի