Հայաստանի գրողների միության նոր նախագահի պաշտոնի համար շրջանառվում են մի քանի թեկնածուների անուններ: Նրանք, սակայն, պնդում են, որ ցանկություն չունեն ղեկավարելու ՀԳՄ-ն: Գրողների միության ղեկավարի պաշտոնակատար, միության քարտուղար, բանաստեղծ, արձակագիր Էդուարդ Միլիտոնյանն «Առաջին լրատվական»-ի հետ զրույցում նշեց, որ չգիտի՝ ինքն ինչու է հայտնվել հավանական թեկնածուների շարքում, ովքեր են շրջանառում իր անունը:
«Ես չեմ շրջանառում, ոչ մի անգամ որևէ տեղ չեմ շրջանառել»,- ասաց նա՝ նշելով, որ ՀԳՄ-ն ունի իր կանոնադրությունը, և նոյեմբերին տեղի կունենա համագումար, որը կտա շատ հարցերի պատասխանը, որոնք մեկ անձ՝ նախագահը կամ քարտուղարը, չի որոշում, այլ միության անդամները:
Հարցին՝ հնարավո՞ր է արդյոք ՀԳՄ և Երևանի գրողների միության միավորում մեկ կառույցի ներքո, Միլիտոնյանը պատասխանեց, որ չգիտի՝ Երևանի գրողների միությունում ովքեր են: «Ցավոք սրտի, ես նրանց հետ չեմ առնչվել որևէ գրական կամ այլ հարցով, նման բան չի եղել, չգիտեմ՝ այդ միության անդամներն ովքեր են. դուք երևի ինձնից լավ գիտեք»,- ասաց նա՝ նկատելով, որ օրերից մի օր կարող է Նկարիչների միությունն էլ գալ և ասել՝ միանում եմ ՀԳՄ-ին: Միլիտոնյանը նշեց, որ պետք է աշխատել կանոնադրության շրջանակներում:
Դրամատուրգ Կարինե Խոդիկյանի խոսքով՝ ինքը ստիպված է լինում պարբերաբար հերքել ՀԳՄ նախագահի պաշտոնին որպես թեկնածու ներկայացված լինելը:
Գրող, հրապարակախոս Մերուժան Տեր-Գուլանյանը նշեց, որ բարոյական չէր ՀԳՄ նախկին նախագահի մահվանից անմիջապես հետո ՀԳՄ թեկնածուների մասին խոսելը: «Համարում եմ, որ դա մեծ ամոթ էր և անբարոյականություն, երբ դեռ մարդու դին հողին չհանձնած՝ ինչ-որ սինլքոր կայք այդպիսի պատմություն է սկսում: Ես հրապարակավ հայտարարում եմ՝ չեմ ուզել, չեմ ուզում և չեմ ուզելու դառնալ ՀԳՄ նախագահ, անգամ վարչության անդամ չեմ ցանկացել դառնալ, ես այդ ամենից ազատագրված մարդ եմ: Համագումարի օրը կգա՝ բարին հետը. մի ձայն ունեմ, այն էլ կտամ»,- ասաց նա:
ՀԳՄ և Երևանի գրողների միության միավորումը Տեր-Գուլանյանը հավանական չհամարեց, բայց նաև չբացառեց: «Այդ մասին չէի մտածել: Չեմ կարծում, բայց ով գիտի՝ ամեն ինչ հնարավոր է»,- ասաց նա:
Հրապարակախոսի համոզմամբ ՝ ՀԳՄ ապագա նախագահը նախ պիտի մեծ կազմակերպիչ լինի, պարտադիր չէ, որ լինի մեծ գրող, բայց պիտի հասկանա, գրականության մարդ լինի: Ամենակարևորը, ըստ նրա, գրական մամուլ ձևավորելն է, որպեսզի գրողը կարողանա իր ստեղծագործությունները հրապարակել գրական մամուլում և ստանալ արժանապատիվ հոնորար, ոչ թե թոշակ:
Տեր-Գուլանյանի կարծիքով՝ ՀԳՄ-ում առանձին խմբավորումներ չկան. «Ես, ճիշտն ասած, չեմ հետաքրքրվում Գրողների միությամբ, չեմ էլ հետաքրքրվում՝ ինչ է կատարվում այնտեղ: Ես ՀԳՄ կգնամ միայն համագումարին՝ համքարության ներկայացուցչի իմ առաքելությունը կատարելու համար»,- ասաց նա:
Գրողների կարծիքները միանգամայն տարբեր են ստեղծագործական միությունները հասարակական կազմակերպության վերածելու հարցում: Էդվարդ Միլիտոնյանը նշում է, որ շարունակում են պայքարել դրա դեմ, օրենքի նախագծի տեսքով խնդիրն արդեն ներկայացված է ԱԺ-ում: «Գրողների, Կոմպոզիտորների, Նկարիչների միության անդամները յուրահատուկ հիմնարկներ են, յուրահատուկ պահանջներ ունեն. մարդիկ ստեղծագործում են, հիմնարկներում չեն ուզում աշխատել, թոշակի հարց կա, բազմաթիվ այլ հարցեր: Այս պայքարին միացել են բոլոր ստեղծագործական միությունները, որովհետև ստեղծագործողների շահերն են պաշտպանվելու»,- ասաց նա:
Ի տարբերություն նրա՝ Մերուժան Տեր-Գուլանյանը կարծում է, որ միությունները վաղուց արդեն ՀԿ-ի կարգավիճակ ունեն: «Այդ կառույցները պետությունն է ֆինանսավորում: Խնդիրը հետևյալն է. ստեղծագործական միությունն ինքնին պիտի որ հասարակական կազմակերպություն լինի, եթե պետությունն է ֆինանսավորում՝ ինքն էլ կպահանջի, կթելադրի՝ ինչ գրեն, ինչ նկարեն, իսկ մենք անկախ երկրում ենք ապրում, ստեղծագործողներն ազատ են:
Ես չգիտեմ՝ քաղաքակիրթ աշխարհում, ովքեր մեզանից առաջ են ժողովրդավարություն ընդունել, կա՞ն նման միություններ, թե՞ կան մարդիկ, ովքեր համախմբված են ինչ-որ գաղափարի շուրջը»,- ասաց նա:
Տեր-Գուլանյանը բնական է համարում, որ միությունները պայքարում են, բայց նաև բնական է համարում դրանց վերափոխումը ՀԿ-ի:
Կարինե Խոդիկյանը հարցի շուրջ մեկնաբանություններից հրաժարվեց՝ նշելով, որ գործընթացին ծանոթ չէ, տեղյակ է զուտ լսելու մակարդակով, համագումարի ժամանակ ինչ ասվել է, այդ է լսել: «Կոմպետենտ պատասխան չունեմ, ցավոք սրտի»,- ասաց նա:
ՀԳՄ նոր նախագահը կընտրվի նոյեմբերին՝ Գրողների միության համագումարում: Արդեն իսկ ստեղծված է միության արտահերթ համագումարի նախապատրաստման հանձնաժողով:
