Թերթը գում է, որ հայ մայրերի կաթում հայտնաբերվել Է 44.4% հեքսաքլոր և 9.8%-ից ավելի ԴԴՏ թունաքիմիկատ: «Դա նշանակում է, որ Հայաստանում այս թունաքիմիկատները բնամթերքի մեջ մեծ տարածում են գտել: Այս մասին, ըստ «Ա1+»-ի, հայտնել է «Հայ կանայք հանուն առողջության և առողջ շրջակա միջավայրի» հ/կ ներկայացուցիչ Լիլիկ Սիմոնյանը՝ երեկ Ծաղկաձորում անցկացված միջազգային համաժողովի ժամանակ՝ նվիրված ՀՀ-ում թունավոր աղտոտիչներով ու թունաքիմիկատներով աղտոտվածության հիմնախնդիրների քննարկմանը»։
«Այսօր հանրապետությունում կա 500 տոննա թունաքիմիկատ, որոնց 60%-ը կազմում են 1-ին և 2-րդ կարգի թունաքիմիկատներ: Իսկ Նուբարաշենի գերեզմանոցը սողանքային գոտի է, ինչը նպաստում է թունաքիմիկատների տարածմանը: Սրան նպաստում Է նաև մարդկանց անտեղյակությունը, թանի որ տարածքին շատ մոտ հայտնաբերվել են գոմաղբեր, այսինքն՝ մարդիկ այս տարածքում նաև անասուններ են արածեցնում»,- հավելել է նա:
«Արնիկա» ասոցիացիայի ներկայացուցիչ Յինդրիխ Փեթրլիկի խոսքերով՝ թունաքիմիկատներով ամենահագեցած տարածքը Նուբարաշենն է, ինչպես նաև թունաքիմիկատային պահեստներ ունեցող Ջրառատ գյուղն ու Էջմիածին և Մասիս քաղաքները։
«Այստեղ մեծ է հատկապես ԴԴՏ-ի քանակը: Սակայն այլ մանրէասպանների դեպքում ևս սահմանային նորման բարձր է: Այս տարածքներում առկա թափոնների այրումը կարող է դառնալ նոր աղտոտման պատճառ: Այդ պատճառով պետք է գտնել խնդրի լուծման լավազույն տարբերակները»,- ասել է Փեթրլիկը:
«Նուբարաշենի գերեզմանոցում ոչ միայն առկա են տարատեսակ թափոններ, այլև մեծ խնդիր Է այն, որ այդ քիմիկատները խառնված են իրար, ինչը ավելի Է բարդացնում դրանց ոչնչացումը»,- գրում է «Առավոտ»-ը և հավելում, որ ըստ արտակարգ իրավիճակների նախարարության ներկայացուցիչ Կարապետ Կարապետյանի՝ Նուբարաշենում պետք է ստեղծել կանխարգելիչ համակարգեր և վերափաթեթավորել ժամկետանց մանրէասպաններին:
«Մեկ անգամ 2008 թ.-ին և դրանից հետո՝ 2010-ի մայիսին, որոշ մարդիկ մտել էին գերեզմանոց՝ համապատասխան տեխնիկայով ավերելով գերեզմանոցի վերին շերտը: Նրանք մի քանի մետր փորել էին և այդպես բաց թողել ու գնացել, ինչը ևս պատճառ դարձավ թունաքիմիկատների տարածման: Հարուցվեց քրեական գործ, սակայն մինչ օրս այդ մարդիկ չեն հայտնաբերվել: Այդ օրվանից ոստիկանությունը այստեղ շուրջօրյա վերահսկողություն է իրականացնում»,- ասել է ԱԻՆ ներկայացուցիչը:
«Ըստ ԱԻՆ պաշտոնական տվյալների՝ Նուբարաշենում կա 57,000 կգ տարբեր տեսակի թունաքիմիկատ»,- հայտնում է «Առավոտ»-ը։
