ՀՀ-ում Վրաստանի արտակարգ և լիազոր դեսպան Թենգիզ Շարմանաշվիլին վստահեցրեց, որ չերքեզների ցեղասպանության ճանաչումը չի նախաձեռնվել Վրաստանի նախագահի կամ կառավարության կողմից, այլ դա եղել է խորհրդարանի նախաձեռնությունը, իսկ խորհրդարանը անկախ մարմին է:
Դեսպանի գնահատմամբ, ի տարբերություն այլ ժողովուրդների, չերքեզները գտնվում են ոչնչացման եզրին, և հնարավոր է՝ 10-20 տարի հետո նման ազգ չլինի. «Ճիշտ է, ես չեմ կարող խորհրդարանի անունից խոսել, բայց, ամենայն հավանականությամբ, հենց այս պատճառով է խորհրդարանը առաջնահերթորեն քննարկել և ընդունել այս հարցը»:
Դեսպանը նկատեց, թե խորհրդարանը շեշտել է, որ չերքեզների ցեղասպանության ճանաչումը ոչ մի կերպ չի կարող ազդել Ռուսաստանի տարածքային ամբողջականության նկատմամբ մեր վերաբերմունքի վրա. «Ի տարբերություն Ռուսաստանի, մենք հարգում ենք միջազգային իրավունքները և նրա տարածքային ամբողջականությունը հարցականի տակ չենք դնում»:
Ինչ վերաբերում է Հայոց ցեղասպանության՝ Վրաստանի կողմից չճանաչելու հանգամանքին, դեսպանը նշեց, որ եթե չերքեզների ցեղասպանության ճանաչումը նախատեսված լիներ կառավարության կողմից, ապա ինքն ավելի կոնկրետ պատասխան կտար, բայց խորհրդարանի քայլերի մասին չի կարող որևէ բան ասել:
Դեսպանը նկատեց, որ հայ-վրացական հարաբերություններն ակտիվորեն զարգանում են և այդ են վկայում երկկողմ պաշտոնական այցերը:
«Ես ուրախ եմ, որ և՛ Հայաստանի, և՛ Վրաստանի նախագահները շեշտել են, որ երկկողմ հարաբերությունների վրա որևէ ազդեցություն չեն կարող թողնել այլ երկրների հետ հարաբերությունները: Մենք հարևաններ ենք եղել և զարգացել այն ժամանակ, երբ երրորդ սուբյեկտները դեռ գոյություն չունեին: Մեր երկկողմ հարաբերությունները վերաբերում են միայն մեզ»,- անդրադառնալով Հայաստան-Ռուսաստան սերտ և Ռուսաստան-Վրաստան վատ հարաբերությունների պայմաններում հայ-վրացական հարաբերությունների խորացմանը՝ կարծիք հայտնեց ՀՀ-ում Վրաստանի արտակարգ և լիազոր դեսպան Թենգիզ Շարմանաշվիլին:
Համեմատելով Հայաստանի և Վրաստանի ներքաղաքական իրավիճակը՝ Շարմանաշվիլին նկատեց, որ, ի տարբերություն Վրաստանի, Հայաստանի ներսում տեղի ունեցող զարգացումները ներքին են և չեն հրահրվում արտաքին ուժերի կողմից:
Ջավախքի խնդրին անդրադառնալով՝ Շարմանաշվիլին նշեց, որ Ջավախքին դեռևս խորհրդային տարիներին արժանի ուշադրություն չի դարձվել, սակայն այժմ վրացական իշխանությունները բարեփոխումներ են իրականացնում Ջավախքում, լուծվում են գազաֆիկացման, ճանապարհաշինության հարցերը: Նա տեղեկացրեց, որ առաջիկայում շինարարություն է սկսվելու Ջավախքում. «Վրաստանի կառավարությունն ամեն ինչ անելու է, որ Սամցխե-Ջավախքի տարածքը ապագայում զարգանա: Ախալքալաքում ուզում են կառուցել գարեջրի մեծ գործարան՝ մոտ չորս հարյուր աշխատատեղով: Այն կառուցում են հայ շինարարները՝ ամերիկահայ բիզնեսմենների աջակցությամբ: Սաակաշվիլին հանդիպել է ամերիկահայ բիզնեսմենների հետ և զրուցել այդ թեմայով»:
Ինչ վերաբերում է հայ որոշ քաղաքական գործիչների Վրաստանում անցանկալի անձ հայտարարելուն՝ դեսպանը նկատեց, որ դա ցանկացած պետության իրավունքն է՝ ազգային անվտանգության տեսանկյունից արգելել որոշ անձանց մուտքը սեփական երկիր՝ դա որևէ կերպ չպատճառաբանելով: