Ամերիկացի սենատոր Ջոն Մաքքեյնը պատասխանել է The New York Times-ում Ռուսաստանի նախագահի հոդվածին՝ իր տեքստը հրապարակելով Pravda.ru կրեմլամետ ռեսուրսում:
Սենատորն առանձին անդրադարձել է սիրիական հարցին, որին նվիրված է եղել Պուտինի սյունակը The New York Times-ում: Մաքքեյնի խոսքերով՝ Պուտինը հրաժարվելով հաստատել Սիրիայի հարցով ՄԱԿ-ի անվտանգության խորհրդի բանաձևը՝ «Ռուսաստանը դարձրեց բռնապետի ընկեր և ճնշվածների թշնամի»:
«Նրան չեն վստահում այն ժողովուրդները, որոնք փորձում են մեր մոլորակը դարձնել ավելի անվտանգ, խաղաղ և ծաղկող»,- նշել է սենատրը:
Ռուս քաղաքացիներին ուղղված ուղերձում Մաքքեյնը քննադատել է Պուտինի ստեղծած քաղաքական համակարգը, որը «գոյատևում է կոռուպցիայի ու ճնշումների հաշվին և բավականաչափ ուժեղ չէ՝ անհամաձայնություն թույլ տալու համար»:
Սենատորն ընդգծել է, որ չնայած ռուսական ԶԼՄ-ների կողմից ստեղծված իր կերպարին՝ ինքը Ռուսաստանի դեմ տրամադրված չէ: «Ես հակառուս չեմ: Ես ռուսամետ եմ, ավելի ռուսամետ, քան այն վարչակարգը, որը վատ է ղեկավարում ձեզ այսօր»,- գրել է Մաքքեյնը:
Նրա խոսքերով՝ Պուտինը և նրա շրջապատը չեն հավատում հիմնական արժեքներին, ինչպիսիք են կյանքի իրավունքը, ազատությունը և երջանկության ձգտումը:
«Նրանք չեն հարգում ձեր արժանապատվությունը և չեն ընդունում ձեր իշխանությունն իրենց վրա: Նրանք պատժում են անհամաձայնությունը և ձերբակալում են ընդդիմադիրներին: Նրանք մանիպուլյացիայի են ենթարկում ձեր ընտրությունները: Նրանք վերահսկում են զանգվածային լրատվական միջոցները: Նրանք հետապնդում, սպառնում և արգելում են կազմակերպություններին, որոնք պաշտպանում են ինքնակառավարման ձեր իրավունքը: Իրենց իշխանությունը պահպանելու համար նրանք խրախուսում են կոռուպցիայի ծաղկումը ձեր դատարաններում և տնտեսությունում, ահաբեկում և նույնիսկ սպանում են լրագրողներին, որոնք փորձում են բացահայտել կաշառակերությունը»,- գրել է սենատորը:
Վլադիմիր Պուտինի հոդվածը The New York Times-ում հրապարակվել է սեպտեմբերի 11-ին: Դրանում Ռուսաստանի նախագահը մասնավորապես հայտարարել է, որ ԱՄՆ-ը չի կարող հարվածել Սիրիային առանց ՄԱԿ-ի Անվտանգության խորհրդի որոշման: Նա նաև քննադատել է Բարաք Օբամային այն բանի համար, որ ժողովրդին ուղղված կոչում նա ամերիկացիներին անվանել է «բացառիկ»:
