Բրիտանացի փորձագետները կարծում են, որ ՄԱԿ-ի փորձագետների զեկույցը անհերքելի ապացույցներ չի պարունակում, որոնք կվկայեին, որ Սիրիայում քիմիական զենք օգտագործել է Բաշար Ալ-Ասադի վարչակարգը:
Հիշեցնենք, որ երկուշաբթի ՄԱԿ-ի գլխավոր քարտուղար Պան Գի Մունը ներկայացրել է ՄԱԿ-ի փորձագետների զեկույցը Սիրիայում օգոստոսի 21-ին քիմիական հարձակման վերաբերյալ: Զեկույցում հաստատվում է, որ Դամասկոսի Ղուտա արվարձանում իրականում կիրառվել է զարին գազ: Պան Գի Մունն ընդգծել է, որ տեսուչների խնդիրը չէ պարզել, թե ով է մեղավոր քիմիական հարձակման համար, այդ նպատակով անհրաժեշտ է նոր հետաքննություն:
International Defence Review (հրատարակում է IHS Jane’s հետազոտական կենտրոնը) ամսագրի գլխավոր խմբագիր Նիք Բրաունը RIA Novosti-ին տված հարցազրույցի ժամանակ ասել է, որ ինքը զեկույցում համոզիչ տվյալներ չի տեսնում, որոնք միանշանակորեն ապացուցում են, թե ով է կիրառել քիմիական զենք:
«Կան որոշ հանգամանքներ, որոնք իբր մատնանշում են, որ հարձակումներն իրականացվել է Ալ-Ասադի վարչակարգի կողմից, սակայն իրավաբանական առումով պարզ չէ, թե ով է քիմիական զենքն արտադրել և այնուհետև կիրառել»,- ասել է նա:
Բրաունի հետ համաձայն է նաև Մերձավոր Արևելքի և Հյուսիսային Աֆրիկայի հարցերով IHS Jane’s-ի վտանգների գնահատման բաժնի մենեջեր Ֆիրա Աբի Ալին:
«Զեկույցն ապացուցում է, որ քիմիական զենք օգտագործվել է մի քանի վայրերում: Սակայն տեսուչների մանդատը չի նախատեսել պարզել այն փաստը, թե ով է կիրառել քիմիական զենք, այդ պատճառով զեկույցում դրա մասին ոչինչ չի ասվում»,- ասել է Աբու Ալին:
Բրաունը նշել է, որ Սիրիայում հակամարտության փոփոխական բնույթի պատճառով շատ բարդ է միանշանակ մեկնաբանություններ տալ քիմիական զենքի վերաբերյալ: Նրա խոսքերով՝ շատ են դեպքերը, երբ ապստամբները սպառազինություն են գտել ռազմական պահեստների և զինանոցների գրավման միջոցով, այդ պատճառով նրանք հիմնականում օգտագործում են այն նույն հրազենային զենքը, հրթիռները, ինչ սիրիական բանակը:
«Բացի այդ, շատ ապստամբներ սիրիական բանակի դասալիքներ են, անհնար է հստակ ասել, թե նրանք ինչ պատրաստվածություն, փորձ և գիտելիք ունեն: Բնականաբար, հնարավոր է պատկերացնել, որ որոշ ապստամբներ կարող էին կիրառել ինչպես հին, այնպես էլ նորագույն սիրիական զենք»,- հավելել է նա:
Աբու Ալին կարծում է, որ ավելի հավանական է՝ հին սպառազինություն օգտագործել է սիրիական վարչակարգը:
Բրաունը համոզված է, որ Սիրիա ռազմական ներխուժման գաղափարի կողմնակիցները, ամենայն հավանականությամբ, կմատնանշեն քիմիական զենքի օգտագործման փաստը ռազմական գործողությունների օրինականացման համար:
Նրա գործընկերն իր հերթին կարծում է, որ Արևմուտքի երկրները ցանկանում են խուսափել Սիրիայի պատերազմից, և նրանց բանակցությունները Ռուսաստանի հետ, հավանաբար, կարող են կանխել ռազմական գործողությունը:
