Լուկա դե Մոնտեզեմոլոն` «Ֆերարի»-ի նախագահը, պատմել է, թե ինչի հիման վրա է կայացվել Ֆելիպե Մասայի` «Ֆորմուլա 1» մրցարշավի հաջորդ մրցաշրջանից սկսած թիմում չլինելու որոշումը:
«Ֆելիպե Մասան շատ լավ անձնավորություն է ու անկրկնելի երիտասարդ: Մեր փոխհարաբերությունները Ֆելիպեի հետ շատ պարզ են եղել: Նրան արդյունք է հարկավոր: Հենց դա էլ պետք է նաև թիմին: Ֆելիպեն հաջողությունների է հասել, բայց նրա մարզավիճակը ստաբիլ չէ: Նա շատ լավ մրցարշավներ էր անցկացնում, բայց դա չէր անում մշտապես: Օրինակ, 2012 թվականին մեզ շատ չբավականացրեցին այն միավորները, որ Մասան կարող էր թիմին բերել թիմային հաշվարկում: Այդ իսկ պատճառով նման որոշումը նրան օգուտ կբերի», – ասել է «Ֆերարի»-ի ղեկավարը:
Դե Մոնտեզեմոլոն նաև վստահություն է հայտնել, որ, չնայած հեռանալու մասին լուրը իմանալուն, Ֆելիպեն հաջող կանցկացնի մրցաշրջանի առաջիկա մրցարշավները:
«Ես հույս ունեմ, որ մեր վերջին նորամուծությունները թույլ կտան թիմին բարելավել արդյունքները: Մենք պետք է հաշվի առնենք, որ «Ռեդ Բուլ»-ի երկու մեքենաներից միայն մեկն է, որ մշտապես թիմին միավորներ է բերում: Թիմը մինչև վերջին կիլոմետրը կաջակցի Ֆերնանդո Ալոնսոյին, բայց ես հույս ունեմ, որ Ֆելիպեն նույնպես կկարողանա օգուտ բերել թիմին: Մասան անհավանական անձնավորություն է: Ասում են, թե նա այլևս չի՞ օգնելու Ալոնսոյին: Աղաչում եմ, մի ասեք դա: Նա նախկինի պես կշարունակի օգնել Ալոնսոյին չեմպիոնության համար պայքարում ու թիմին ընդհանուր հաշվարկում առաջինը լինելու գործում»,- շարունակել է Դի Մոնտեզեմոլոն:
Նա նաև մեկնաբանել է Ֆերնանդո Ալոնսոյի` թիմում տեղի ունեցած վերջին իրադարձություններից հետո արտահայտած դժգոհությունը: Բացի այդ Դի Մոնտեզեմոլոն խոսել է առաջիկա մրցաշրջանից ունեցած սպասումների մասին:
«Ես առաջին մարդն եմ, ով կհասկանար Ալոնսոյի դժգոհությունը: Այսպես ասեմ. նրա տխրությունը կարելի է համեմատել մի ֆուտբոլիստի տրամադրության հետ, ում անսպասելիորեն փոխարինել են, ինչի արդյունքում նա մեկ-երկու «քաղցր» խոսք է հղել մարզչի հասցեին: Ես ավելի շուտ կգերադասեմ գործ ունենալ նման ֆուտբոլիստի, քան ոչնչության հետ: Ինչ վերաբերում է ինքնագովազդին, ապա ամեն ինչ այստեղ ավելի պարզ է: Հույս ունեմ, որ Կիմի Ռայկոնենի համար լրագրողների հետ շփվելու լավագույն առիթները կլինեն հաղթանակները: Ես նաև հույս ունեմ, որ նա մեծ ներդրում կունենա թիմի հաջողություններում: Ալոնսոն չի կարող ամբողջ բեռը միայնակ տանել:
Երբ ես դարձա «Ֆերարի»-ի նախագահ, Շումախերի հետ միասին մենք կարողացանք կերտել թիմի պատմության լավագույն տարիները ու հիմա մենք նորից պատրաստ ենք հաղթանակներ տանել: Այն բացը, որ առաջացավ Շումախերի հեռանալուց հետո, պատճառաբանվում էր նաև սիմուլյատորների ու աերոդինամիկայի հետ ունեցած խնդիրներով: Այնուամենայնիվ, այս երեք տարիներին Սկուդերիան գրեթե մշտապես պայքարել է չեմպիոնության համար մինչև վերջին պահը:
Ես մեծ հույսեր եմ կապում այն մարդկանց հետ, ովքեր այսուհետ աշխատելու են մեր տեխնիկական թիմում: Վերջապես մենք ունենք այն ստեղծագործ միտքը, որն այդքան պակասում էր: Ջեյմս Էլիսոնը, ով գլխավորելու է աերոդինամիկայի մասնաբաժինը, շատ լավ գիտի այն թիմին, որի հետ աշխատելու է: Այլ թիմեր նույնպես ցանկանում էին հրավիրել նրան, բայց նա գերադասեց տեղափոխվել «Ֆերարի», ու նրա գալուստը կնշանակի մի շարք հատվածներում աշխատանքի վերաբաժանում: Միևնույն ժամանակ Պետ Ֆրեյը կաշխատի մեքենայի տեխնիկական առաջընթացի ու ցուցանիշների բարելավման ուղղությամբ», – ասել է «Ֆերարի»-ի նախագահը:
Եվ վերջում նա անդրադարձավ «Ֆերարի»-ի ֆինանսական վիճակին:
«Վերջին տարիներին մեզ մոտ աշխատավարձերի կրճատում չի եղել: Ծախսերի աճի տեմպը նվազել է, բայց ֆինանսավորումը շարունակում է մնալ կայուն: Կարծում եմ` մենք պետք է վերադառնանք աշխատանքային այն սկզբունքներին, որ գործում էին նախորդ դարի 90-ականներին, շարունակենք աշխատել թեստերի վրա, երիտսարդ արշավորդներին պրակտիկայի հնարավորություն տանք, քանի որ այսօրվա դրությամբ GP2 մրցարշավը դարձել է ծաղրելի մի բան ու որևէ արժեք չունի: Իսկ թեստերի այն քիչ քանակը, որ այս պահին մենք կարող ենք մեզ թույլ տալ, պետք է հատկացնենք մրցող արշավորդներին:
«ՖԻԱՏ»-ի աջակցությու՞նը: Այդպիսին չկա: Մենք նրանցից ոչ մի լումա չենք ստանում ու մեր գործունեությունը ծավալում ենք միայն հովանավորչական պայմանագրերի, մրցանակային հիմնադրամների ու սերիական մեքենաների թողարկման շնորհիվ»,- ասել է Դի Մոնտեզեմոլոն:
