Վրաստանի նախագահ Միխեիլ Սաակաշվիլին մտահոգված է Կարս-Ախալքալաք երկաթուղու նախագծի կասեցմամբ: Սաակաշվիլին երկուշաբթի խորհրդարանական փոքրամասնության հետ հանդիպման ժամանակ նշել է՝ միակ նախագիծը, որի վրա կառավարությունն ինտենսիվ աշխատում է, Ռուսաստանին կապող Լարսի ճանապարհն է, իսկ երկաթուղային ճանապարհը, որը կապում է Եվրոպայի հետ, գրեթե կանգնեցված է:
Նրա խոսքով՝ այդ երկաթուղու շինարարությունը պետք է ավարտվի այս տարի, սակայն առկա տեմպերի դեպքում նախագիծն ավարտելու համար կպահանջվի առնվազն 3 տարի: Այս մասին տեղեկացնում է Trend գործակալությունը:
Նրա համար ոչ պակաս մտահոգիչ է Թբիլիսիում երկաթուղու կառուցման աշխատանքների դանդաղեցումը: Նախագծի վրա ավելի քան 200 մլն դոլար է ծախսվել: Նրա խոսքով՝ երկաթուղին Թբիլիսին կվերածեր այլ քաղաքի, խցանումները լիովին կվերանային: Այդ երկաթուղին գրեթե պատրաստ է, կառուցվել են 9 թունելներ, մի քանի երկար էստակադաներ:
«Սակայն կառավարությունն այն պաշտոնապես կասեցրել է միայն այն պատճառով, որ դա մենք ենք արել»,- ասել է Սաակաշվիլին:
