ԱՄՆ ֆինանսների նախկին նախարար Լարի Սամերսը հանել է իր թեկնածությունը Դաշնային պահուստային համակարգի նախագահի պաշտոնից: ԱՄՆ նախագահ Բարաք Օբամային ուղղված նամակում նա ասել է, որ ցանկանում է «խուսափել հակամարտություններից»՝ հաղորդում է BBC-ն:
Սամերսի նշանակմանը դեմ էին մի քանի ազդեցիկ դեմոկրատներ: Փորձագետները նշում էին, որ հենց Սամերսն ունի Բեն Բերնանկեի (որի լիազորություններն ավարտվում են 2014թ. հունվարին) պաշտոնը զբաղեցնելու ամենամեծ հնարավորությունները: Այժմ այս պաշտոնի ֆավորիտ է համարվում համակարգի փոխնախագահ Ջանեթ Յելենը:
Օբաման հայտարարել է, որ ընդունում է Սամերսի որոշումը:
«Լարին իմ թիմում եղել է առանցքային անդամ այն օրերին, երբ մենք բախվեցինք սարսափելի տնտեսական ճգնաժամին և հաճախ շնորհիվ նրա գիտելիքների, իմաստության և առաջնորդական որակների կարողացանք վերականգնել տնտեսության աճը և հասնել առաջընթացի, որը տեսնում ենք այսօր»,- ասվում է Օբամայի հայտարարության մեջ:
Լարի Սամերսը ֆինանսների նախարարի պաշտոնը զբաղեցրել է Բիլ Քլինթոնի վարչակազմում՝ 1999-2001թթ.: Մինչ այդ՝ 1991-1993թթ., նա եղել է Համաշխարհային բանկի գլխավոր տնտեսագետը: 2009-2011թթ.՝ Օբամայի օրոք, Սամերսը զբաղեցրել է Տնտեսական ազգային խորհրդի ղեկավարի պաշտոնը:
