ԱՄՆ նախագահ Բարաք Օբաման, սեպտեմբերի 11-ի ահաբեկչությունների 12-րդ տարելիցի կապակցությամբ անվտանգության հավելյալ միջոցառումներ սահմանելու հետ կապված, խորհդակցություն է անցկացրել։
Ինչպես հաղորդում է ITAR-TASS-ը՝ վկայակոչելով Սպիտակ տան հայտարարությունը, նախագահը հիշեցրել է, որ ամերիկացի ժողովրդի պաշտպանությունը երկրի ներսում և դրա սահմաններից դուրս ազգային անվտանգության առաջնային ուղղությունն է:
Պենտագոնի մամլո քարտուղար Ջորջ Լիթլի հայտարարության համաձայն՝ ԱՄՆ-ի ՊՆ-ն Պետդեպարտամենտի հետ արդեն ձեռնարկել են մի շարք միջոցառումներ՝ ԱՄՆ-ի դիվանագիտական ներկայացուցչությունների անվտանգությունը պահպանելու համար: Նրա խոսքերով՝ ամերիկյան զորքերը գտնվումե ն բարձր մարտական պատրաստականության վիճակում:
Այսօր ԱՄՆ-ում տեղի կունենան նաև մի շարք սգո արարողություններ: Նյու Յորքում դրանք սկսվում են մեկ րոպե լռությմաբ՝ տեղի ժամանակով ժամը 08.46-ին: 12 տարի առաջ ուղիղ այդ ժամին Համաշխարհային առևտրի կենտրոնի երկնաքերներից մեկին բախվեց ահաբեկիչների կողմից հափշտակված ինքնաթիռներից առաջինը: Սգո արարողությունը կանցկացվի այն վայրում, որտեղ տեղակայված են եղել երկվորյակ աշտարակները: Ներկայում այդտեղ գտնվում է հուշահամալիր: Ավանդույթի համաձայն, զոհվածների հարազատները, որոնց թիվը 2977 է, կկարդան նրանց անունները: Ընթերցումը հինգ անգամ կընդհատվի մեկ րոպե լռությամբ, որոնք կհիշեցնեն այդ ողբերգական օրվա զարգացումները՝ երկրորդ ինքնաթիռի բախումը հարավային աշտարակին, երրորդ ինքնաթիռի բախումը Պենտագոնին, հարավային աշտարակի փլուզումը, Փենսիլվանիա նահանգում 93-րդ չվերթի վթարը և հյուսիսային աշտարակի փլուզումը:
Ինչպես նախորդ տարի, այս տարի ևս միջոցառմանը չեն մասնակցի քաղաքական գործիչներ:
