Newsru.com-ի փոխանցմամբ, կիրակի առավոտյան Մոսկվայում առողջական խնդիրների պատճառով մահացել է Աբխազիայի նախագահ Սերգեյ Բաղապշը։ Մահվանից առաջ նա չի հասցրել տալ իր հետնորդի անունը։ Աբխազական սահմանադրության համաձայն՝ նախագահական ընտրությունները պետք է անցկացվեն երեք ամսվա ընթացքում, իսկ մինչ այդ նախագահի պարտականությունները ժամանակավորապես կատարելու է 59-ամյա փոխնախագահ Ալեքսանդր Անկվաբը, որին համարում են այդ ընտրությունների գլխավոր ֆավորիտը։
Նախագահի մյուս հիմնական թեկնածուն 60-ամյա վարչապետ Սերգեյ Շամբան է։ Փորձագետները կարծում են, որ երկու թեկնածուներն էլ հաղթելու հավասար հնարավորություններ ունեն։ Դա կարող է ներքին հակամարտությունների պատճառ հանդիսանալ, ինչը ցանկալի չէ Ռուսաստանի համար։
Քաղաքագետները կարծում են, որ Մոսկվան, ելնելով իր նախկին անհաջող փորձից, թեկնածուներից ոչ մեկին ուղղակիորեն չի աջակցի։ Երկու թեկնածուներն էլ ռուսամետ դիրքորոշում ունեն։ Չնայած դրան՝ Մոսկվան ստիպված կլինի աբխազական նոր լիդերի հետ նոր հարաբերություններ սկսել, որոնցում գերիշխելու է տնտեսական համագործակցության գործոնը։
Միևնույն ժամանակ Աբխազիայում ակտիվացել են նաև ԵՄ-ը և Թուրքիան։ Ստեղծված իրավիճակից կարող է օգտվել նաև Վրաստանը, որը կփորձի ապակայունացնել Աբխազիայում տիրող իրավիճակը։
Եվս մեկ թեկնածու է համարվում գլխավոր ընդդիմադիր, նախկին փոխնախագահ Ռաուլ Խաջիմբան, որը 2004 թվականի ընտրություններում Ռուսաստանի թեկնածուն էր։
Ամեն դեպքում փորձագետները նշում են, որ ով էլ դառնա Աբխազիայի երրորդ նախագահ, դա փոփոխություններ չի առաջացնի տարածաշրջանի քաղաքական դասավորության մեջ։ Նախկինի նման Սուխումը կողմնորոշված կլինի դեպի Մոսկվա, կշարունակի կոշտ դիրքորոշում ունենալ Վրաստանին միանալու հարցում, փորձեր կձեռնարկի սեփական ինքնիշխանության ճանաչման ընդլայնման ուղղությամբ և այլն։
Հիշեցնենք, որ Սերգեյ Բաղապշն Աբխազիայի նախագահ է դարձել 2005 թվականի փետրվարի 12-ին:
