Հայաստանում ըստ պաշտոնական տվյալի գործազուրկ է ավելի քան 57 850 մարդ (հուլիսի վերջի դրությամբ): Նրանց գրեթե մեկ երրորդը՝ մոտ 31 տոկոսը Երևանից է (17 814 մարդ): Սա բնական է, քանի որ Հայաստանի բնակչության մոտ կեսը կենտրոնացված է հենց մայրաքաղաքում:
Երևանում ամենաշատ գործազուրկները Շենգավիթում են: Այս վարչական շրջանում գործազուրկ է 2 987 մարդ: Մի փոքր հետ է մնում Էրեբունի վարչական շրջանը, որտեղ պաշտոնական տվյալով գործազուրկ է 2 792 մարդ: Գործազուրկային եռյակը եզրափակում է Մալաթիա-Սեբաստիա վարչական շրջանը ՝ 2 242 գործազուրկով: Ավելի քան 3 անգամ գործազուրկները պակաս են Արաբկիրում՝ 837 մարդ: Այս վարչական շրջանում Երևանի կտրվածքով ամենաքիչ գործազուրկներն են:
Իսկ ըստ քաղաքների գործազրկության ցուցանիշով նույն տրամաբանությամբ Երևանին հաջորդում է Գյումրին, որը մայրաքաղաքից հետ է մնում 2.5 անգամ՝ 6 947 գործազուրկ: Այնուհետև Վանաձորն է 3 268 գործազուրկ մարդկանցով և մի փոքր լավ վիճակում է Հրազդանը՝ 3 017 գործազուրկով:
Ի դեպ հանրապետությունում պաշտոնապես գրանցված գործազուրկների թիվը հունվար-հուլիսին անցած տարվա նույն ժամանակի համեմատ նվազել է 8.9 տոկոսով:
