Մարզահամերգային համալիրում ընթանում է Հայաստանի հանրապետական կուսակցության ամփոփիչ հանրահավաքը: Քարոզարշավի ամփոփիչ հանրահավաքին մասնակցում է ՀՀԿ-ի ողջ վերնախավը՝ կուսակցության նախագահ, ՀՀ նախագահ Սերժ Սարգսյանը, վարչապետ Կարեն Կարապետյանը, ԱԺ նախագահ Գալուստ Սահակյանը, Երևանի քաղաքապետ Տարոն Մարգարյանը, նախարարներ, տարբեր պաշտոնյաներ ու կուսակցության համախոհներ:
Կուսակցության ամփոփիչ հանրահավաքին ելույթով հանդես եկավ ՀՀ արդարադատության նախարար, ՀՀԿ-ի համամասնական համարի 3-րդ հորիզոնականում գտնվող Արփինե Հովհաննիսյանը, ով ասաց, որ մրցապայքարում ՀՀԿ-ն հավատարիմ է մնացել իր ոճին, սկզբունքներին և ընտրողների հետ անկեղծ, ազնիվ ու բաց է եղել.«Ընդամենը ժամեր անց կավարտվի քարոզարշավը: Այս մեկ ամսվա ընթացքում քաղաքական մրցապայքարի թատերաբեմ էին ելել բոլոր քաղաքական ուժերը, ձեզ ներկայացնելով իրենց ծրագրերը տալով հավանական, իսկ առավել հաճախ անհավանական խոստումներ: Բոլորի նպատակը մեկն էր՝ հայցել ձեր վստահության քվեն, արժանանալ ձեր վստահության քվեին:
Իհարկե, այդ մրցավազքի պայմաններում բավական բարդ էր զերծ մնալ գայթակղությունից հնչեցնելու անիրատեսական խոստումներ, բայց մենք հավատարիմ մնացինք մեր սկզբունքներին, մեր ոճին ու ծրագրին, ձեզ հետ լինելով անկեղծ, ազնիվ ու բաց, հավատալով, որ դա է ձեր քվեին արժանանալու միակ ուղին»:
Արփինե Հովհաննիսյանն ասաց, որ այս ընթացքում ՀՀԿ-ն ունեցել է մի քանի համոզմունք և առաջնորդվել դրանցով՝ մարդիկ են կերտում պատմությունը և ոչ հակառակը, իշխանության պարտականությունն է ստեղծել այնպիսի պայմաններ, որ մեզնից յուրաքանչյուրը կարողանա իր և իր երկրի պատմության կերտողը դառնա.«Համոզմունք համար երկու: Մենք համոզված ենք, որ մեր բռնած ուղին ճիշտ է, բարեփոխումների ալիքն՝ անշրջելի, իսկ մեր կամքն ու հավատամքը անկասելի: Մենք չենք երկնչում և չենք վախենում, որովհետև գիտենք, որ մեր բռնած ուղին դառնում է առաջընթաց, առաջընթաց, որի անխուսափելիության մասին արդեն փաստում են թվերը»:
Խոսքն ուղղելով հավաքվածներին՝ Արփինե Հովհաննիսյանն ասաց, որ նրանք կարող են կասեցնել այդ ուղին, բայց նրանք կարող են նաև հավանություն տալ դրա շարունակականությանը. «Այդ ժամ մենք մեր ձեռքից բաց չենք թողնի երևույթները դեպի դրականը փոխելու հնարավորությունը: Սիրելի՛ հայրենակիցները, առաջընթացը պրոցես է, ուղղություն, ընտրությունն է, ապրիլի 2-ի խորհրդարանական ընտրություններին կատարեք դեպի անվտանգության և առաջընթացի այն բանաձևումը, որը մենք ենք առաջարկում»:
Արփինե Հովհաննիսյանը վստահություն հայտնեց, որ այդ դեպքում իրենցից յուրաքանչյուրը կդառնա իր պատմության կերտողը.«Ուրեմն դեպի առաջընթաց, որ միասին ենք հասնելու, և դեպի ծրագիր, որ միասին ենք իրականացնելու, և դեպի պատմություն, որ միասին ենք կերտելու, դեպի Հայաստան, որը բոլորս ենք ուզում»:
