«Քարոզարշավի ընթացքում հիմնական խնդիրը, որ կար հանդիպումների ընթացքում, դա այն էր, որ ՀՀ քաղաքացին այլևս չէր հավատում ընտրություններին, չէր հավատում, որ իր քվեն նշանակություն ունի, և «ելք կա»-ն հենց դա էր նշանակում, որ իրենց մեկ քվեից անգամ շատ բան է կախված: Ես այս քարոզարշավից հաճույք ստացա. բակերում մեզ հետ «ելք կա» վանկարկող երեխաներից մինչև պատշգամբներից վանկարկող նրանց ծնողները մեզ դրական էներգիա և ոգևորություն էին փոխանցում»,- այս մասին, ամփոփելով նախընտրական քարոզարշավը, «Առաջին լրատվական»- ի հետ զրույցում նշեց «Հանրապետություն» կուսակցության առաջնորդ «Ելք» դաշինքի պատգամավորության թեկնածու Արամ Զ. Սարգսյանը:
Անդրադառնալով դիտարկմանը, որ շրջանառվում են լուրեր քաղաքացիներին ընտրակաշառք բաժանվելու մասին, Արամ Սարգսյանը նկատեց, որ միայն երկու քաղաքական ուժ ունեն դրա հնարավորությունը. «ՀՀԿ-ն և ԲՀԿ-ն, որը, չգիտես ինչու, «Ծառուկյան» դաշինք է անվանվում, ընդհանուր համաձայնության են եկել և Հայաստանը քվոտաներով բաժանել են իրար մեջ: Միանշանակ իշխանությունն է ԲՀԿ-ին թույլ տալիս ընտրակաշառք բաժանել: Եթե թույլ չտա, Ծառուկյան դաշինքը ՀՀԿ-ից քիչ ձայն կհավաքի, որովհետև ադմինիստրատիվ ռեսուրս չունի: ՀՀԿ-ն թույլատրում է, որովհտև իրեն պետք է այդ «բուֆերը», հակառակ դեպքում բողոքական ձայները գալու էին «Ելք-ին»:
Ա. Սարգսյանի դիտարկմամբ՝ Գ. Ծառուկյանի վերադարձով կեղծ ընդդիմություն է ձևավորվում և դրա միջոցով փորձում են իրական ընդդիմության քվեները չեզոքացնել:
Արամ Սարգսյանը նշեց, որ «Ելք» դաշինքը նախատեսում է Հայաստանը եվրոպական մոդելի պետություն դարձնել. «Մեր երկրում բոլոր ոլորտներում հետընթաց է: Սակայն հետընթացից հետո միանգամից վազել հնարավոր չէ: ԵՏՄ-ից միանգամից չպետք է դուրս գալ, ԵՏՄ-ից դուրս գալու համար կա կանոնակարգ, որը մեկ տարի ժամանակ է պահանջում: Պետք է ԵՏՄ-ից դուրս գալ, բայց այնպես, որ ԵՏՄ անդամ երկրները չթշնամանան, մեր բացատրությունն այնպիսին պիտի լինի, որ Ռուսաստանը հասկանա, որ դա իր համար էլ է շահեկան: Մենք ԵՏՄ անդամ երկրների ժողովուրդների հետ խնդիր չունենք, խնդիր ունենք սխալ կառավարման հետ»:
Ա. Սարգսյանի խոսքով՝ Արցախի հիմնահարցը գերխնդիրն է, և որևէ տնտեսական միություն չի լուծելու անվտանգության խնդիրները. «Մենք՝ ինքներս պիտի լուծենք մեր անվտանգության խնդիրները, և ինքներս պիտի կարողանանք սպասարկել մեր բանակին, մեր բանակը պիտի կարողանանք պահել այն մակարդակի վրա, որի պարագայում թշնամին չի գնա արկածախնդրություն: Խնդիրը պետք է լուծվի վստահության մթնոլորտ ձևավորելով, դա հանարվոր է խաղաղ բանակցային գործընթացի միջոցով: Չի կարելի գնալ զիջումների խաղաղության դիմաց, խաղաղության դիմաց պետք է վճարի ողջ տարածաշրջանը: Փոխզիջումները կարգավաիճակի դիմաց պետք է լինեն: Մեծ քայլերով ընդհանրական լուծում հնարավոր չէ, Լևոն Տեր-Պետրոսյանը մեծ քայլեր է առաջարկում, որը Հայաստանի համար ցավոտ է, փոքր քայլերի ժամանակն է»:
Անդրադառնալով դիտարկմանը, որ կա տեսակետ, թե մեր բոլոր չլուծված խնդիրները պայմանավորված են ղարաբաղյան գործոնով՝ Արամ Սարգսյանը նշեց. «Եղբայրս ասում էր. «Ղարաբաղը քավության նոխազ չէ, Ղարաբաղը մեր հպարտությունն է»: Ես հպարտանում եմ Ղարաբաղով ու ղարաբաղցիներով, ղարաբաղցիները ուժեղ, մարտնչող ժողովուրդ են, իրար օժանդակել գիտեն: Ես ասել էի՝ չեմ հավատում ղարաբաղցիների հայրենասիրությանը՝ նկատի ունենալով միայն Ղարաբաղից այստեղ եկած պաշտոնյա ղարաբաղցիներին, որոնք պաշտոնի են ձգտել, ոչ թե իրենց երկիրը պաշտպանելու:
Մանրամասները՝ տեսանյութում: