«ՀԱԿ-ն իր ամբողջ ներուժն օգտագործելու է օր առաջ արտահերթ ընտրութուններ անցկացնելու համար»,- լրագրողների հետ հանդիպման ժամանակ ասաց ՀԱԿ մամուլի խոսնակ Արման Մուսինյանը։ Արտահերթ ընտրությունների անցկացումը շարունակում է մնալ ՀԱԿ-ի օրակարգի առանցքում, սակայն հետագա ծրագրի մանրամասները կներկայացվեն մայիսի 31-ի համապետական հանրահավաքում, որտեղ կամփոփվի առաջին փուլը, և կնախանշվի երկրորդ փուլի ուղին։
Այն հարցին, թե ինչի շուրջ պետք է շարունակվեն բանակցությունները իշխանության և ՀԱԿ-ի միջև, Արման Մուսինյանը պատասխանեց. «Այս երեք պահանջների լուծմամբ քաղաքական ճգնաժամը Հայաստանում չի ավարտվել։ Այն փաստը, որ ընտրությունները կեղծվել են, և ոչ լեգիտիմ իշխանություն է ստեղծվել, արդեն հարատև ճգնաժամ է ստեղծել»,- ասում է Մուսինյանը և շեշտում արտահերթ ընտրությունների անհրաժեշտությունը։
Մուսինյանը կարծում է, որ Նիկոլ Փաշինյանը և Սասուն Միքայելյանը ելույթ կունենան մայիսի 31-ի հանրահավաքին, ինչը նոր թափ կհաղորդի շարժմանը։
Հարցին, թե ընդունելի՞ է արդյոք համաներմամբ քաղբանտարկյալների ազատ արձակումը, Մուսինյանը պատասխանեց. «Մենք պահանջել ենք, որ մեր ընկերները մեր կողքին լինեն մայիսի 31-ի հանրահավաքին, թե ինչ տեխնիկական մեթոդներով դա կարվի՝ իշխանության պրոբլեմն է»։
Մուսինյանը անդրադարձավ նաև այլ ընդդիրմադիր ուժերի մասին տրված հարցին՝ պատասխանելով. «ՀԱԿ-ը շարունակում է մտածել, որ ընդդիրությունը միավորված է։ Համենայն դեպս, իրենց ընդդիմադիր կոչող այլ ուժերին չի հաջողվել համոզել ՀԱԿ-ին կամ հասարակությանը իրենց մտադրությունների ազնվության մեջ»։