«Առաջին լրատվական»-ի զրուցակիցն է ԱԺ ԲՀԿ խմբակցության ղեկավար Նաիրա Զոհրաբյանը:
-Տիկին Զոհրաբյան, քարոզարշավն ընթանում է, ԲՀԿ պատգամավորների, անդամների, նաև կուսակցության առաջնորդ Գագիկ Ծառուկյանի կողմից երկրում ստեղծված ծանր իրավիճակի գնահատականներում խոսում են կոռուպցիայից, տնտեսության վատ վիճակից, բայց չկան հասցեական գնահատականներ, չկան թիրախներ: Ինչո՞ւ չի հնչում, թե կոնկրետ ովքեր են պատասխանատուները, ովքեր են ձախողել այս ամենը:
-Նախ՝ համաձայն չեմ, որ չեն հնչում: Մեր բոլոր քարոզիչները հստակ հնչեցնում են, որ երկիրն այս վիճակին հասցնելու միակ պատասխանատուն գործող իշխանությունն է: Եթե մենք գալիս ենք փոփոխությունների կարգախոսով, եթե Գագիկ Ծառուկյանը հայտարարում է, որ ինքը վերադարձել է քաղաքականություն, որովհետև պարտք ունի տալու ժողովրդին, եթե հայտարարում է, որ բոլոր ոլորտներում անհրաժեշտ են լրջագույն բարեփոխումներ, սա մեկ բանի ցուցիչ է, այս իշխանությունը պիտի հեռանա, որովհետև այս իշխանությունն է երկրի բոլոր ոլորտներում ձախողումների միակ պատասխանատուն: Եթե մենք այսօր ունենք կոտրված տնտեսական ողնաշար, եթե ցանկացած ոլորտում ձախողում է, եթե պաշտոնյայի միակ կրեդոն, միակ մոտիվացիան կոռուպցիան և կաշառակերությունն է, եթե արտագաղթը հասել է ազգային անվտանգությունը վտանգող սահմանագծին, ապա այսօր իշխանությունը ՀՀԿ-ն է, և այս ամենի պատասխանատուն ՀՀԿ-ն է: Մենք պիտի անենք հնարավորը, որ այս կուսակցությունը այս ընտրությունների միջոցով հնարավորություն չունենա վերարտադրվելու:
Հարցազրույցն ամբողջությամբ՝ տեսանյութում:
