Facebook սոցիալական ցանցը շուտով կգործարկի սեփական նվագարկիչը՝ Spotify համակարգի հետ մեկտեղ: Այս մասին հաղորդում է Forbes ամսագիրը: Դա հնարավորություն կտա աշխարհի ամենամեծ սոցիալական ցանցին երաժշտություն լսել և կիսվել դրանով հենց Facebook-ի կայքում:
Նոր ծառայությունը հասանելի կլինի առաջիկա երկու շաբաթների ընթացքում: Այս պահին այն դեռ փորձարկման փուլում է: Գործարկելուն պես օգտատերերն իրենց էջին կտեսնեն Spotify կանաչ կոճակը:
«Մենք աշխատանքներ ենք տանում Facebook-ի հետ ինտեգրվելու համար՝ մշտապես աշխատելով նրանց հետ, որպեսզի հնարավորինս բարելավենք համագործակցությունը»,- ասել է Spotify-ի ներկայացուցիչը, որը, սակայն, չի նշել, թե որքան է կազմել այս գործարքի գինը:
Այս պահին նաև քննարկվում է, թե ինչպես է կոչվելու այդ ծառայությունը՝ Facebook Music, թե՞ Spotify on Facebook: Հատուկ նշվում է, որ այս ծառայությունը կգործի այն երկրներում, որտեղ Spotify-ը ներկայացված է, բացի ԱՄՆ-ից: Այս պահին հայտնի չէ, թե արդյո՞ք ծառայությունը հասանելի կլինի նաև Հայաստանում:
