«Ազատագրենք հուշարձանն օլիգարխից» հասարակական շարժումն իր ակտիվ պայքարն է սկսում՝ զսպելու Հին Երևանի սրտում գտնվող «Փակ շուկայի» սեփականատեր օլիգարխի հարաճուն անհնազանդությունն ու անօրինական գործողությունները:
Շարժման շարքերում է նաև քանդակագործ Վիգեն Ավետիսը, ով այսօր նախաձեռնության անդամների հետ միասին հանդիպեց լրագրողներին և իր մտահոգությունը հայտնեց «Փակ շուկայի» տարածքում տեղի ունեցող մշակութային վանդալիզմի առնչությամբ:
Նա նշեց, որ իրենց կյանքի ամենահետաքրքիր պահն է, երբ իրենք դարձել են այն մարդիկ, ովքեր իրավունք են ստացել տեր կանգնելու իրենց պապերի մշակութային ժառանգությանը:
Վիգեն Ավետիսը կարևորեց երկու հարց: Ըստ նրա՝ եթե քաղաքապետարանը և պետական այլ մարմիններ չունեն ժողովրդի պաշտպանությունը, նրանք անզոր են օլիգարխների կամ հանցավոր աշխարհի ճնշումներին դիմակայելու հարցում, ուստի իրենք են եկել օգնելու քաղաքապետարանին և մյուս կառույցներին, որոնք արդեն անզոր են այս կիսամութ օլիգարխի կառույցների դեմ պայքարում: Որպես քանդակագործ՝ նա ուշադրություն հրավիրեց շուկայի պատմամշակութային արժեքի վրա:
«Ի սկզբանե սա չի եղել «Փակ շուկա», այս կառույցը ծածկագրված է, տաճար է այն՝ կառուցված հին հայկական քրիստոնեական և հեթանոսական սկզբունքներով: Սակայն քանի որ խորհրդային տարիներն էին, ուստի չէին կարող այն անվանել Անահիտի կամ Սուրբ Պետրոսի տաճար, և անվանվեց Փակ շուկա, բայց իր ամբողջ կառույցով սրբագույն կառույց է՝ իր բարձրությամբ, լայնությամբ, ներսի 20-րդ դարի ամենահանճարեղ կապերը ասես օրգանական կապեր լինեն: Այդ կամարներն ասես մարդու ներքին օրգաններ լինեն, ասես մարդու ողնաշարը լինի: Սա 20-րդ դարի հայկական ճարտարապետության հանճարեղ մտահղացում է՝ թաքնված «Փակ շուկա»-ի ներքո»,- նշեց նա՝ հավելելով, որ այն ուզում են սարքել առևտրի կենտրոն, այնինչ դա սրբավայր է:
Մանրամասներին ծանոթացեք տեսանյութի միջոցով: