Грузия Online-ի փոխանցմամբ, ԱՄՆ նախագահ Բարաք Օբաման Վրաստանի անկախության 20-րդ տարեդարձի կապակցությամբ շնորհավորական նամակ է հղել Վրաստանի նախագահ Միխեիլ Սաակաշվիլիին.
«Երբ Վրաստանն անկախացավ, ԱՄՆ-ը նրան աջակցեց անկախ և ինքնիշխան պետություն կառուցելու հարցում: Վերջին 20 տարիներին Վրաստանը վիթխարի առաջընթաց է գրանցել ժողովրդավարության, բարեկեցության ու անվտանգության բնագավառներում: ԱՄՆ-ը շնորհակալ է համաշխարհային անվտանգության հարցում իր ներդրումն ունենալու համար: Խոսքը մասնավորապես վերաբերում է Աֆղանստան խաղաղապահներ առաքելուն:
ԱՄՆ-ն աջակցում է Վրաստանի ինքնիշխանությանն ու տարածքային ամբողջականությանը և շարունակելու է համագործակցել նրա հետ խաղաղության ու կայունության աջակցության հարցերում»:
Իսկ ադրբեջանական APA լրատվական գործակալության փոխանցմամբ, Ռուսաստանի նախագահ Դմիտրի Մեդվեդևն իր հերթին մայիսի 28-ին լրացող Հանրապետության օրվա կապակցությամբ շնորհավորել է Ադրբեջանի նախագահ Իլհամ Ալիևին.
«Ադրբեջանը տեսանելի հաջողություններ է գրանցել պետականաշինության ոլորտում: Ռուս-ադրբեջանական հարաբերությունները հենված են բարիդրացիական ու փոխվստահության սկզբունքների վրա:
Մենք Ադրբեջանի հետ սերտորեն համագործակցում ենք տարածաշրջանային այժմեական խնդիրների շուրջ և շարունակելու ենք մեր կառուցողական երկխոսությունը, թե՛ երկկողմ, թե՛ բազմակողմ ձևաչափերով»: