18-29 տարեկան իրանցիների մոտ 84.5 տոկոսը հանդես է գալիս ժամանակավոր ամուսնությունների օգտին՝ գրում է իրանական Shargh թերթը՝ հղում անելով Երիտասարդության և սպորտի հարցերով նախարարության անցկացրած հետազոտությանը:
Հետազոտությունն անցկացվել է Իրանի 14 քաղաքներում, 3000 երիտասարդների շրջանում: Հետազոտության տվյալների համաձայն՝ երիտասարդության մոտ 62.9 տոկոսը փորձում է խուսափել ժամանակավոր ամուսնությունից վատ համբավի պատճառով:
Վերջին մի քանի տարիներին իրանցիներին ժամանակավոր ամուսնություններ կնքելու ծառայություններ առաջարկող կայքերի թիվն աճել է:
Իրանի կիբերոստիկանությունը կպայքարի անօրինական կայքերի դեմ, որոնք ժամանակավոր ամուսնություններ են առաջարկում, իսկ օրինական իրավաբանական կենտրոնների մասին տեղեկությունը կզետեղվի նախարարության կայքում:
Իրանում կնքվում են ժամանակավոր և մշտական ամուսնություններ: Ժամանակավոր ամուսնությունները կնքվում են այն դեպքում, երբ տղամարդը ֆինանսական բավարար միջոցներ չունի: Նման ամուսնությունը կարող է երկարաձգվել կողմերի փոխադարձ համաձայնությամբ կամ դադարեցվել՝ կրկին փոխադարձ համաձայնությամբ: