Սիրիական ճգնաժամի հետևանքով մեկ միլիոն երեխա փախստական է դարձել, ընդ որում՝ նրանցից 740 հազարը 11 տարեկանից փոքր են: Ինչպես հաղորդում է ITAR-TASS-ը, նման տվյալներ է պարունակում ՄԱԿ-ի Մանկական հիմնադրամի (ՅՈՒՆԻՍԵՖ) և Փախստականների հարցերով ՄԱԿ-ի գերագույն հանձնակատարի վարչության համատեղ հայտարարությունը:
«Մեկ միլիոն փախստական երեխան հերթական թիվը չէ: Դա իրականում գոյություն ունեցող երեխա է, ով կտրվել է իր տնից, հավանական է՝ նաև ընտանիքից, անցել է սարսափների միջով, որոնք մենք նոր ենք սկսում գիտակցել: Մենք բոլորս պետք է ամաչենք»,- ասել է ՅՈՒՆԻՍԵՖ-ի գործադիր տնօրեն Էնտոնի Լեյքը՝ հավելելով, որ միջազգային հանրությունը չի կատարում իր պարտականությունները երեխաների հանդեպ:
Փախստականների հարցերով ՄԱԿ-ի գերագույն հանձնակատար Անտոնիու Գուտերեշն իր հերթին նշել է, որ Սիրիայում երիտասարդությունը զրկվում է տնից, ընտանիքից, ապագայից, և եթե նույնիսկ նրանք հատում են սահմանը, նրանք հոգեբանական բարդ վիճակի մեջ են լինում և կարիք ունեն գտնելու կյանքի իմաստը:
ՄԱԿ-ի երկու գրասենյակների հաշվարկների համաձայն՝ երեխաները կազմում են փախստականների թվի կեսը, որոնք հեռանում են Սիրիայից: Ներկայումս սիրիացի փախստականների թիվը մոտենում է 2 միլիոնին:
Բացի դրանից՝ երկրում ներքին փախստական է դարձել շուրջ 2 միլիոն երեխա: ՄԱԿ-ի տվյալների համաձայն՝ Սիրիայում ավելի քան երկու տարի շարունակվող հակամարտության հետևանքով զոհվել է շուրջ 7000 երեխա:
