ՀՅԴ Գերագույն մարմնի ազատամարտիկների հարցերով հանձնախումբը պահեստային զորխումբ է ձևավորում, արդեն շուրջ 650 կամավորական է անդամագրվել: Զորախումբը զորավարժանքներ է անցկացնում, որից հետո պատրաստ կլինի կցագրվել պաշտպանության նախարարությանը: Կանոնավոր բանակ ունենալու պարագայում արդյո՞ք կամավորականների զորախումբ ստեղծելու անհրաժեշտություն կա: Թեմայի շուրջ «Առաջին լրատվական»- ի հետ զրույցում, անդրադառնալով այս հարցին, իր դիտարկումները ներկայացրեց «Հայդուկ» կամավորականների հայրենասիրական ՀԿ նախագահ Մուշեղ Բաբայանը:
Նրա դիտարկմամբ՝ ողջունելի է ՀՅԴ-ի նախաձեռնությունը, քանի որ, ըստ Բաբայանի, կամավորականներից կազմված զորախմբերի առկայությունն ավելի է մեծացնում պաշտպանվածության մակարդակը: «Ավելի շուտ պետք է դա արվեր, մեր մատաղ սերնդին թող իջեցնեին ուսումնական կենտրոններում պարապեին, իսկ առաջին գծում 45, 50-60 տարեկանները կանգնեին»,- նշեց Մ. Բաբայանը:
Նրա խոսքով՝ կամավորական հիմունքները հայ ազգի համար դարեր շարունակ եղել են, կան և պիտի լինեն: «Քառօրյա պատերազմի օրերին, երբ մեր զինվորները պայքարում էին անօրենների, բորենիների դեմ, մեր կամավորականները ոտքի ելան, և այս շարժումն էլ իր խոսքն ասաց»:
Մ. Բաբայանի հավաստմամբ՝ մի խումբ հայրենասիրական կազմակերպություններ սկսել են կամավորական խմբեր ստեղծելու գործընթացը. «Հող չունենք տալու, ունենք վերցնելու… Մենք քաջ գիտակցում ենք, թե ինչ է կատարվելու. ամեն օր բորենիները պատերազմից են խոսում: Նրանց պետք է, որ հայը վերանա, ու մենք այնքան միասնական պիտի լինենք, որ այս հորձանուտի դեմը կարողանանք կանգնել: Կանգնելու ենք և հաղթելու ենք… Մեր կանայք էլ պիտի զինվոր լինեն»:
Մ. Բաբայանն անդրադարձավ նաև օրերս կինոռեժիսոր Արշակ Զաքարյանի և ԱԳՆ մամուլի խոսնակ Տիգրան Բալայանի միջև ծագած առցանց բանավեճին:
Արշակ Զաքարյանն իր ֆեյսբուքյան էջում գրել էր, որ վերջին օրերին հակառակորդի կողմից ակտիվություն է նկատվում, հակառակորդի դիպուկահարները սկսել են ակտիվ աշխատել, սակայն մեր ԱԳՆ-ն չի բարձրաձայնում այդ մասին: Նա նաև նշել էր, որ ադրբեջանցիները «նույնիսկ իրենց սատկած էշին են մեզ վերագրում, իսկ մեր դիվանագիտություն էդ նույն սատկած էշի ականջին քնած է…»:
Այս գրառմանը շատ կոշտ, անձնական վիրավորանքների տիրույթում էր արձագանքել Տիգրան Բալայանը՝ նշելով, որ «միջակություններն իրենց իրավունք են վերապահում քննադատել ԱԳՆ աշխատանքը կամ մի քանի անգամ դիրքեր գնալով, լուսանկարվելով զինվորների հետ՝ իրենց ինքնափիարով են զբաղված»:
«Բա նման մարդուց՝ Արշակ Զաքարյանից կարելի՞ է նեղանալ, եթե նա գիշեր-ցերեկ զինվորի հետ է, լուսաբանում է զինվորի առօրյա կյանքը, դրա մեջ վատ բան ես չեմ տեսնում: Տիգրան Բալայանին չեմ ճանաչում, կարծիք չեմ կարող հայտնել, բայց Արշակ Զաքարյանի նման մարդկանց վիրավորելը ճիշտ չեմ համարում»,- նշեց Մ. Բաբայանը:
Մանրամասները՝ տեսանյութում: