«Ազատություն» ռադիոկայանի ադրբեջանական ծառայության փոխանցմամբ, այսօր Ինդոնեզիայի Բալի կղզում բացվելու է «Չմիավորման շարժում» կազմակերպության անդամ երկրների արտգործնախարարների խորհրդաժողովը: Այդ հանդիպումը տևելու է 3 օր։ Հանդիպման ժամանակ կազմակերպությանը կանդամակցեն Ադրբեջանն ու Ֆիջին: Խորհրդաժողովը նվիրված է 118 երկրներ ներառող շարժման 50-ամյակին:
Այն հիմնադրվել է 1961 թվականին և իր մեջ ընդգրկել է զարգացող երկրներին, որոնք չեն ցանկացել դառնալ ԱՄՆ-ի կամ ԽՍՀՄ-ի դաշնակիցներ:
Ակնկալվում է, որ խորհրդաժողովում Ինդոնեզիայի նախագահ Սուսիլո Բամբանգը հանդես է գալու ՄԱԿ ԱԽ-ում բարեփոխումներ իրականացնելու կոչով, որոնք անհրաժեշտ են զարգացող երկրների միջազգային կշիռն ամրագրելու համար:
Հիշեցնենք, որ խորհրդաժողովի աշխատանքներին մասնակցելու նպատակով մայիսի 23-ին Ինդոնեզիա է մեկնել Ադրբեջանի արտգործնախարար էլմար Մամեդյարովը:
