«Առաջին լրատվական»- ի զրուցակիցն է, ՄԱՀՀԻ-ի փորձագետ Ռուբեն Մեհրաբյանը:
-Պարոն Մեհրաբյան, ԵՄ-ն շարունակում է մնալ Հայաստանի ամենախոշոր տնտեսական գործընկերը, չնայած որ մենք ԵՏՄ անդամ ենք: Հենց իշխանություններն են խոսում Հայաստանում տնտեսական խնդիրների մասին, այս դեպքում հարց է առաջանում՝ ինչո՞վ են առաջնորդվում իշխանությունները Հայաստանի տնտեսությունը կարգավորելու հարցում, երբ մեր տնտեսականան շահը հենց ԵՄ-ում է, բայց մենք գտնվում ենք ԵՏՄ-ում և ցածր ցուցանիշներ ենք արձանագրում:
-Ես մտահոգություն ունեմ, որ Հայաստանի իշխանությունները չեն համարում, որ Հայաստանի տնտեսական շահը ԵՄ-ում է: Հայաստանի տնտեսական քաղաքականությունն այսօր սպասարկում է Ռուսաստանի շահերը, որից հետո տակն ինչ մնում է, մնում է Հայաստանին, իսկ մենք տեսնում ենք, որ Հայաստանին գրեթե ոչինչ չի մնում: Բնականաբար Ռուսաստանին սա որևէ ձևով չի մտահոգում. մեսիջը հետևյալն է, եթե ձեզ ձեռք չի տալիս, եկեք Ալթայի երկրամաս, ձեզ քաղաքացիություն կտամ, այստեղ անտեր տարածքներ կան, եկեք, այստեղ ապրեք: Եվ Հայաստանի իշխանությունը, առանձին պաշտոնյաներ ուրախանում են, որ մեր դաշնակիցը հեշտացնում է Ռուսաստանի աշխատանքային շուկա մեր քաղաքացիների մուտքը, և դա փորձում են մեզ վրա «ծախել», որպես ինտեգրացիայի մեծ նվաճում: Սա այլ կերպ, քան սրիկայություն, չի կարելի համարել, սա ոչ միայն քաղաքական կարճատեսություն է, այլ նաև սպառնալիք է Հայաստանի ազգային շահերին և հայկական պետականությանը:
Ի վերջո Հայաստանը պետք է դիվերսիֆիկացնի իր արտաքին քաղաքական, արտաքին տնտեսական և անվտանգության քաղաքականության և պաշտպանական քաղաքականության հետ կապված հարաբերությունները: Եթե Ռուսաստանը մեր դաշնակիցն է, ապա այլևս մեզ թշնամի պետք չէ: Պետք է վերագնահատել սպառնալիքները: Այս աչքակապությանը, այս ինքնախաբեությանը պետք է վերջ տալ… ԵԱՏՄ-ն ֆեյք կառույց է, իսկ ԵՄ-ի հետ լայնածավալ հարաբերությունները Հայաստանի համար կենաց-մահու հարց է:
Հարցազրույցն ամբողջությամբ՝ տեսանյութում:
