Գերմանական «Լեոպարդ 2A4» տանկերը չեն դիմացել մարտական պայմաններում քննությանը։ Սիրիական Էլ-Բաբ քաղաքի մոտ ԴԱԻՇ-ի գրոհայիններին հաջողվել է խոցել 10 մարտական մեքենա, որոնք պատկանել են թուրքական բանակին։ Այս մասին հայտնում է Die Welt-ը։
Նախկինում «Լեոպարդները» համարվել են անխոցելի։ Այդ մոդելի տանկերը կիրառվել են Կոսովոյում և Աֆղանստանում ռազմական արշավների ընթացքում, սակայն նույնիսկ «Թալիբան» շարժման գրոհայինները, որոնք զինված են համեմատաբար ժամանակակից հակատանկային համակարգերով, ի վիճակի չեն եղել դիմակայելու գերմանական մարտական մեքենաներին՝ գրում է պարբերականը։
Die Welt-ի լրագրողները կարծում են, որ նման «ձախողման» պատճառը կարող լինել թուրք զինվորականների անփորձությունն ու թուրքական բանակի բարձրագույն հրամանատարության սխալները։
Ինչպես նշում է պարբերականը՝ ահաբեկիչները հարձակվել են «Լեոպարդների» վրա՝ հստակ իմանալով, թե մարտական մեքենայի որ մասերն են ավելի խոցելի հակատանկային հրթիռների համար։
Die Welt-ը գրում է, որ տանկը նախատեսված է դիմային մարտերի համար, իսկ կողմնային հատվածից այն զրահապատ է անբավարար չափով։ Բացի այդ, որոշ փորձագետներ հայտարարել են, որ 60 տոննա կշռող մարտական մեքենան նախատեսված չէ փողոցային մարտերի համար։
