Թուրքական Today’s Zaman թերթում հրապարակվել է «Քրդական հարցի» մասնագետ (17 տարի բանտում անցկացրած) Բարըշ Ալթընթաշի «Հայկական, քրդական և ասորական հարցերը պետք է դիտարկել որպես մեկ ամբողջություն» խորագրով հոդվածը:
«20-րդ դարի սկզբին «Միություն և առաջադիմություն» (İttihat ve Terakki) կուսակցությունն ուներ կայսրության վերակազմավորման վիթխարի պլաններ, որոնք հանգեցնելու էին կայսրության թրքացմանը:
Նախատեսված էր ազգայնացնել կայսրության տնտեսությունը, ուր ամուր դիրքեր ունեին հայերն ու հույները: Նաև այդ պատճառով տեղի ունեցան նրանց զանգվածային սպանություններն ու բռնագաղթերը, ինչը հետագայում որակվեց որպես Ցեղասպանություն: Միջազգային հանրությունը նույնպես բավական բարեհաճ է գտնվել այդ ծրագրի իրագործմանը:
Երբ մաքրվեցին հայերի և հույների հետ հաշիվները, նրանց ակտիվները հանձնվեցին թուրքերին և քրդերին: Քրդերի վերահսկողության տակ հայտնվեց նաև ասորական համայնքի թողած ունեցվածքը: Երբ հայերը վտարվեցին, պետությունը նրանց այլևս արգելեց ետ վերադառնալ և նրանց ունեցվածքը հանձնեց քրդերի տնօրինությանը: 1915 թվականից հետո քրդերը սկսեցին տեղավորվել քաղաքներում ու գյուղերում՝ հայերի կողմից լքված տներում:
Իրականում թուրքական բուժուազիայի հարստության աղբյուրը հայերի ու հույների թողած ունեցվածքն է, թեև թուրքական տնտեսական պատմության դասագրքերում երբեք չի նշվում այդ մասին»:
Իր ամփոփիչ խոսքում Բեշիքչին հույս է հայտնել, որ քուրդ հետազոտողներն ու հետագա սերունդները կվերանայեն Թուրքիայի տնտեսական պատմությունը, ինչը Թուրքիային կօգնի լուծելու իր դարավոր խնդիրները, որոնց թվում են նաև հայկական և քրդական հարցերը:
Հիշեցնենք, որ «Միություն և առաջադիմություն» կուսակցությունը ստեղծվել է 1889 թվականի մայիսի 21-ին, իսկ կուսակցության վերջին համագումարը կայացել է 1918 թվականի հոկտեմբերի 18-ին, որում պաշտոնապես հայտարարվեց կուսակցության ինքնալուծարման և նոր` «Վերածնունդ» կուսակցության ստեղծման մասին: