Ամերիկացի միլիարդատեր Կարլ Իկանն ասել է, որ իրեն է պատկանում Apple ընկերության բաժնետոմսերի մի մեծ փաթեթ: Ինչպես հայտնում է France Presse գործակալությունը՝ Իկանը չի հստակեցրել, թե ինչ ծավալի է իր փաթեթը: Նա նաև հայտարարել է, որ հանդես է գալիս փոքր փաթեթներ ունեցողներից բաժնետոմսերի հետգնման օգտին, նաև հավելել, որ այսօր ընկերությունը շատ խիստ թերագնահատված է:
Նա հայտնել է, որ արդեն զրուցել է Apple-ի ղեկավար Թիմ Կուկի հետ և մոտ ժամանակներս ծրագրում է շարունակել զրույցը:
Forbes-ը նշում է, որ Իկանի հայտարարությունը հանգեցրել է Apple-ի բաժնետոմսերի կտրուկ աճի: Օգոստոսի 13-ին բաժնետոմսերի արժեքը բարձրացել է 3.8 տոկոսով՝ հասնելով 485.03 դոլարի:
2012-ին ընկերության մեկ բաժնետոմսի րաժեքը գերազանցել է 700 դոլարը: Բաժնետոմսերի ներկայիս արժեքը չի խանգարում Apple-ին մնալ աշխարհում ամենաթանկ ընկերությունը: Ընկերության կապիտալիզացիան կազմում է ավելի քան 440 միլիարդ դոլար:
Նշենք, որ 77-ամյա Կարլ Իկանի կարողությունը 2012-ին գնահատվել է 14 միլիարդ դոլար:
