«Վրացական երազանք»-ի մոտ 60 ակտիվիստներ լքել են դաշինքը և միացել Բուրջանաձեի կուսակցությանը: Այս մասին հաղորդում է PirWeli գործակալությունը՝ վկայակոչելով «Դեմոկրատական շարժման» անդամ Նոնա Մուրվանիձեին:
Նրա խոսքերով՝ այս «անցման» նպատակն է աջակցել նախագահի թեկնածու Նինո Բուրջանաձեին:
Մուրվանիձեն հայտարարել է, որ մինչև հոկտեմբերի 1-ը գլխավոր նպատակը «Միացյալ ազգային շարժմանը» հաղթելն էր: Հենց այդ պատճառով էլ Բուրջանաձեն չի մասնակցել խորհրդարանական ընտրություններին, որպեսզի հաղթող դաշինքի օգտին քվեարկված ձայները չկիսվեին:
«Մարդիկ այսօր տեսնում են, որ «Վրացական երազանք»-ը չկարողացավ իրականացնել արդարություն հաստատելու իր խոստումը: Նրա համակեցությունը «Ազգային շարժման» հետ նման է փոխհամաձայնեցված աշխատանքի, ինչն ավելի ակնհայտ է շրջաններում: Մարդիկ, ովքեր վտանգի տակ են դրել իրենց կյանքը և աջակցել վերոնշյալ դաշինքին, ցնցված են իշխանությունների վարքագծից: Նրանք տեսնում են, որ Վրաստանին պետք է հավասարակշռված և մեծ կապեր ունեցող մի մարդ՝ այնպիսին, ինչպիսին Նինո Բուրջանաձեն է: Հենց այդ պատճառով էլ մեր կուսակցությանը միանալու որոշումը պետական տեսլականի արդյունք է՝ իրական անհանգստություն երկրի համար»,- ասել է Մուրվանիձեն:
