Ֆինանսների նախարարությունը շուտով կթողարկի առաջին եվրապարտատոմսերը: Կառավարության վերջին նիստում հաստատվել է «Եվրապարտատոմսեր թողարկելու նպատակով գլխավոր տեղաբաշխողների հետ պայմանագիր կնքելու մասին» որոշման նախագիծը: Այսպիսով, որպես գլխավոր տեղաբաշխող՝ ընտրվել են երեք հեղինակավոր ընկերություններ` Deutsche Bank AG London Branch-ը, HSBC Bank plc-ը և J.P.Morgan Securities plc-ը:
Արտարժութային պարտատոմսերով միջազգային կապիտալի շուկա մտնելու հայեցակարգը կառավարությունը հաստատել էր դեռևս մայիսին:
Իսկ ի՞նչ կտա եվրապարտատոմսերի թողարկումը Հայաստանին:
Նախ, Հայաստանն առաջին անգամ կթողարկի եվրապարտատոմսեր` այսինքն, պարտատոմսեր արտարժույթով և կտեղաբաշխի դրանք արտասահմանյան բորսաներում, ինչը նոր էջ կբացի ՀՀ տնտեսական քաղաքականության մեջ: Հայասատանը կինտեգրվի միջազգային արժեթղթային շուկաներին և կկարողանա ինքնուրույն ֆինանսական միջոցներ ներգրավել` առանց միջազգային կառույցների միջամտության:
Երկրորդ, եվրապարտատոմսերով ներգրաված միջոցները նախընտրելի են վարկից, քանի որ սովորաբար դրանք տրամադվում են ավելի լավ պայմաններով և ավելի երկար ժամկետով: Իսկ ավելի հարմար պայմաններով գումարներ ներգրավելով` կարելի է մարել մի շարք պետությունների նկատմամբ ունեցած պարտքը: Այսինքն` նախկին պարտքերը գոնե փոխարինել ավելի հարմար պայմաններով պարտքով:
Եվ երրորդ, թողարկելով պետական եվրապարտատոմսեր` կառավարությունը կարող է դեպի միջազգային պարտատոմսերի շուկա դուռ բացել նաև երկրի մասնավոր հատվածի համար, ինչն, անկասկած, վերջին տեղում չէ, երկրի ամբողջ տնտեսության աճն ապահովելու տեսանկյունից:
Առաջին թողարկման համար կառավարությունում խոսում էին 500 մլն դոլարի մասին՝ մինչև 10 տարի մարման ժամկետով։ Տոկոսադրույքը դեռ հայտնի չէ: Համաշխարհային շուկայում տոկոսադրույքը որոշում է հենց շուկան և կարևոր գործոններից է երկրի քաղաքական ու տնտեսական կայունությունը: Որքան վստահելի է տնտեսությունը, այնքան տոկոսադրույքն ավելի ցածր է:
