«Առաջին լրատվական»-ի զրուցակիցն է ՀՀԿ խմբակցության ղեկավար Վահրամ Բաղդասարյանը:
–Պարոն Բաղդասարյան, Կարեն Կարապետյանին հարցրել են՝ ՀՀԿ-ին անդամակցելուց հետո Ձեր վարկանիշն ընկե՞լ է, նա պատասխանել է՝ այո՛, կարծում եմ ընկել է, թեև դժվարացել է ասել, թե որքանով է ընկել, և կատակով ասել է, որ կստուգի: Կարո՞ղ ենք արձանագրել, որ ՀՀԿ-ն վարկանիշ չունի, և արդեն իսկ թե՛ նոր, թե՛ հին ՀՀԿ-ականներն արձանագրում են դա:
-Սխալ եք մեկնաբանում: Յուրաքանչյուր քաղաքական գործիչ, եթե նա անկուսակցական է լինում, առավել ևս վարչապետի պաշտոնում, բնականաբար նրա նկատմամբ հավատը և հույսերը ավելի մեծ են լինում: Երբ որ տվյալ քաղաքական գործիչը, առավել ևս վարչապետը, անդամակցում է որևէ կուսակցության, ոչ միայն հանրապետականին, բնականաբար մյուս կուսակցությունների անդամները վարկանիշի անկում կարող են նկատել:
-Այսինքն՝ ոչ թե հանրությունը, այլ կուսակցականնե՞րը:
-Նրանք հանրության մի մասն են կազմում: Այսօր քաղաքական դաշտը վերջնականապես չի կարողանում այնպիսի տեսք ստանալ, որը կգոհացնի հանրությանը, և ցանկացած կուսակցության անդամագրվելու ժամանակ ցանկացած գործչի վարկանիշն իրոք կարող է անկում ապրել: Ես դա բնական եմ համարում: Մի՛ վերագրեք դա ՀՀԿ-ին անդամակցելուն: ՀՀԿ-ն այսօր իշխանություն է, երբ որ վաղը հայտարարի, որ ընդդիմություն է, իր վարկանիշը պետք է միանշանակ ընկնի: Եվ ընդդիմադիր որևէ քաղաքական ուժ, երբ որ հայտարարի, որ իշխանություն է, նրա վարկանիշն էլ կընկնի: Այդ տեղաշարժերը միշտ բերում են վարկանիշի անկման:
–Կարեն Կարապետյանը ՀՀԿ-ի մասին ասել է. «Ես նկատել եմ իրենց մեջ առաջին հերթին ցանկություն՝ փոխվելու և փոխելու. կստացվի՞, ժամանակը ցույց կտա, բայց դրա անհրաժեշտությունը կա»: Ի՞նչ եք ուզում փոխել ՀՀԿ-ում՝ կեղծի՞քը, թալա՞նը…
-Հոգեբանությունը:
-Մինչև այս պահը ինչպե՞ս է եղել, պարոն Բաղդասարյան:
-Մինչև այս պահը շատ հետաքրքիր հոգեբանություն է եղել, մենք մտածել ենք, որ մենք առանցքային քաղաքական ուժն ենք, մենք միևնույն է, ուժեղ ենք, և մեր թիմի մոտ հանգստություն է եղել: Եվ դա մեզ չի գոհացնում… Այսօր յուրաքանչյուր ՀՀԿ-ական պետք է փոխի իր հոգեբանությունը, պետք չէ այդ հանգստությունը: Մենք պետք է հաղթենք պայքարի միջոցով:
Հարցազրույցն ամբողջությամբ՝ տեսանյութում:
