«ՀՀ-ում ուսանողական վարկերից օգտվելու պրակտիկան համեմատաբար աշխուժացել է վերջին ամիսներին՝ ուսման վարկավորման պետական ծրագրի շրջանակներում համաֆինանսավորմամբ, ցածր տոկոսադրույքով երկարաժամկետ վարկավորման ներդրումից հետո»,- «Առաջին լրատվական»-ին տեղեկացրեց «ՎՏԲ-Հայաստան բանկ»-ի ներկայացուցիչ Նորա Վանյանը:
Աշխարհում լայն տարածում ունի վարկավորման այս տարբերակը, քանի որ վարկատուն վստահ է, որ ստացած կրթությամբ ուսանողն ապագայում մտնելու է աշխատաշուկա և վերադարձնելու է գումարները: Բանկերն ավելի շատ վարկավորում են բուհերի այն մասնագիտությունները, որոնք շուկայում առավել պահանջարկ ունեն: Հայաստանում չկա շուկայի ուսումնասիրություն, և վարկերի տրամադրման համար այդ գործոնը չի դիտարկվում:
«Վարկավորման գործընթացում, կախված մասնագիտությունից կամ բուհից, չկա նախընտրության գործոն: Ընդամենն անհրաժեշտ է վարկառուի՝ ուսանողի ուսումնական հաստատության առկայությունը ուսման վարկավորման պետական ծրագրի շրջանակներում ներառված ուսումնական հաստատությունների ցանկում»,- նշեց «ՎՏԲ-Հայաստան բանկ»-ի ներկայացուցիչը:
«Պրոմեթեյ բանկ» ՍՊԸ-ն «Բնակարան երիտասարդներին» ՓԲԸ-ի հետ կնքված համագործակցության պայմանագրի շրջանակում տրամադրում է ուսանողական վարկեր՝ ուսման վարձավճարների վճարման նպատակով:
Ուսանողական վարկերից կարող են օգտվել պետական և պետական հավատարմագրություն ունեցող բուհերի բակալավրիատի և մագիստրատուրայի ուսանողները:
Վարկի տրամադրման կամ մերժման վերաբերյալ որոշումը կայացվում է լիազոր անձանց կողմից վարկավորման համար անհրաժեշտ (պահանջվող) փաստաթղթերը բանկ ներկայացնելուց հետո՝ 3 աշխատանքային օրվա ընթացքում:
«Կոնվերս բանկ» ՓԲԸ-ն ուսանողական վարկավորման «Իմ ապագան» ծրագրով տրամադրում է առավելագույնը 4 մլն ՀՀ դրամ՝ 84 ամիս առավելագույն ժամկետով:
Կառավարության որոշմամբ՝ ուսանողներին տրամադրվում են մատչելի տոկոսադրույքով վարկեր: Ծրագիրն իրականացվում է «Մատչելի բնակարան» երիտասարդական ՈւՎԿ-ի հետ, որն աշխատում է բանկերի հետ։ Առաջարկվում է այդ նպատակի համար 21 մլն դրամ հատկացնել պահուստային ֆոնդից։
«Բնակարան երիտասարդներին» վերաֆինանսավորում իրականացնող վարկային կազմակերպության կողմից ֆինանսավորվող «Ուսանողական պետական վարկը» ուսումնական 4 տարվա համար է, տրամադրվում է առավելագույնը 1 մլն 800 հազար ՀՀ դրամ՝ տարեկան 12 % տոկոսադրույքով, որից երկու տոկոսը, իսկ գերազանցության դեպքում՝ երեք տոկոսը, սուբսիդավորվում է կառավարության կողմից:
Վարկը տրամադրվում է մինչև 10 տարի մարման ժամկետով, առաջին չորս տարվա ընթացքում մարվում են միայն տոկոսադրույքները:
