«Մեդիա կենտրոն»- ում լրագրողների հետ հանդիպմանը ԱԺ մոնիթորինգ ծրագրի ղեկավար Լուսինե Վասիլյանը, ներկայացնելով մեծամասնական ընտրակարգով ընտրված պատգամավորների գործունեության վերաբերյալ ուսումնասիրությունները, նշեց, որ ԱԺ հինգերորդ գումարման մեծամասնական ընտրակարգով ընտրված պատգամավորներից 41-ից 30-ը ներկայացնում են իշխող ՀՀԿ խմբակցությունը: Մեծամասնական կարգով ընտրված պատգամավորներից ակտիվ է եղել միայն 15-ը, 25-ն անգամ «խոսափողին մոտ չեն եկել»:
Ըստ հարցերի և ելույթների՝ ամենաակտիվ պատգամավորն է Վանաձորի թիվ 30 ընտրատարածքից ընտրված Էդմոն Մարուքյանը (խմբակցությունում ընդգրկված չէ), ապա Երևանի թիվ 8 ընտրատարածքից ընտրված Կորյուն Նահապետյանը (ՀՀԿ) և երրորդ հորիզոնականում է Երևանի թիվ 2 ընտրատարածքից ընտրված Սամվել Ֆարմանյանը (ՀՀԿ):
Խորհրդարանի միլիոնատեր 16 պատգամավորներից 12-ը կրկին ՀՀԿ-ից են:
Ծրագրի փորձագետ Գոռ Աբրահամյանի խոսքով՝ մտահոգիչ է, որ մեծամասնական պատգամավորների մեծամասնությունը կենտրոնացած է ամենախոշոր երկու խմբակցությունում՝ ՀՀԿ-ում և ԲՀԿ-ում. «Տպավորություն է, որ իշխանության մենաշնորհն է եղել մեծամասնական ընտրակարգով պատգամավորներին խորհրդարանում ընդգրկել: Խնդիր է նաև այն, որ հասարակության չկուսակցականացված մասը լիարժեք հնարավորություն չի ունենում պատգամավոր «գործուղել խորհրդարան»,- ասաց Աբրահամյանը:
Ամենաշատ դրամական միջոցներ հայտարարագրած, ինչպես նաև բացակայած պատգամավորը ԲՀԿ նախկին նախագահ Գագիկ Ծառուկյանն է:
Մանրամասները՝ տեսանյութում: